काठमाडौं- बैकिङ प्रणालीमा अधिक तरलता भएपछि राष्ट्र बैंकले एकैसाथ एक खर्ब तरलता खिच्ने भएको छ। राष्ट्र बैंकले बैकिङ प्रणालीबाट एक खर्ब तरलता २१ दिनका लागि खिच्न लागेको हो।

हाल प्रणालीमा ६ खर्ब १५ अर्बको हाराहारीमा अधिक तरलता भएपनि कर्जा प्रवाह बढ्न सकेको छैन। जसले गर्दा बैंक वित्तीय संस्थाले निक्षेपको ब्याजदर घटाएर ३ प्रतिशतको हाराहारीमा ल्याएका छन्।

निक्षेपको ब्याजदर ३ प्रतिशतभन्दा तल आउन नदिनका लागि राष्ट्र बैंकले बैंक वित्तीय सस्थाबाट ३ प्रतिशतमै निक्षेप खरिद गरिरहेको छ। 

राष्ट्र बैंकले जारी गरेको निक्षेप संकलन उपकरणमा बैंक वित्तीय संस्थाले आज आइतबार ३ बजेसम्म आवेदन दिन सक्ने छ्न्। उक्त उपकरण भदौ २३ गते परिपक्व हुने छ।