काठमाडौं- काठमाडौंबाट रसुवाको स्याफ्रुबेसी गएको एयर डाइनेस्टीको ९ एन-एजेडी हेलिकोप्टर सम्पर्कविहीन भएको छ।
त्रिभुवन विमानस्थल कार्यालयका प्रमुख जगन्नाथ निरौलाका अनुसार हेलिकोप्टर १ बजेर ५४ मिनेटमा काठमाडौंबाट उडेको थियो। हेलिकोप्टर नुवाकोटको सूइरेचौर भन्ने स्थानपछि सम्पर्कमा नआएको बताइएको छ।
हेलिकोप्टर चारजना यात्रु र एकजना पाइलटसहित पाँच जना सवार रहेका थिए। यात्रु चारैजना चिनियाँ नागरिक रहेको विमानस्थल कार्यालयले जानकारी दिएको छ। चिनियाँ यात्रुहरू जुदाड टाङ, जी ली, यियाद वु र जेमिङ सी सवार रहेका छन्।
शिवपुरी गाउँपालिका-७ स्थित शिवपुरी जंगलको सुइरेचौर क्षेत्रमा आगो बलेको र धुँवा देखिएपछि स्थानीयले हेलिकोप्टर दुर्घटना भएको हुनसक्ने आशंका गरी प्रहरीलाई खबर गरेको सूचना प्राप्त भएको जिल्ला प्रशासन कार्यालय नुवाकोटका सहायक प्रमुख जिल्ला अधिकारी कृष्णप्रसाद हुमागाईले जानकारी दिएका छन्।
