काठमाडौं- सुधारतर्फ जाने अपेक्षाविपरीत लामो समयदेखि उतारचढाव हुँदै ओरालो गति नै बढी देखिएको सेयर बजारमा यो साताको पहिलो कारोबार पनि ओरालोतिरै लागेको छ।

गएको साता तीन कारोबारमा घटेर दुई कारोबारमा भने उकालो लागेको सेयर बजारले वृद्धितर्फको संकेत गरे पनि उल्लेख्य वृद्धि समात्न सकेको छैन। यो साता पनि आइतबार वृद्धिको अपेक्षाविपरीत बजारमा दोहोरो अंकको गिरावट आएको छ।

आइतबार १४.८३ अंकले घटेर २०३७.०९ बिन्दुमा पुगेको बजारमा तीन अर्ब ६० करोड ७१ लाख ९८ हजार रूपैयाँको कारोबार भएको छ। ४९ वटा कम्पनीको सेयर मूल्य बढ्दा १ सय ९० कम्पनीको सेयर मूल्यमा गिरावट आएको छ भने ७ वटा कम्पनीको सेयर मूल्यमा परिवर्तन भएको छैन।

कमजोर भइरहेको बजार वृद्धितर्फ जाने अपेक्षाविपरीत बढीजसो ओरालोतिर नै लागिरहेको छ। विश्वासयोग्य वातावरणको खोजी भइरहेको सेयर बजारमा लगानीकर्ताहरूले भरपर्दो आधार नभेट्दा बजार धरमर नै भइरहेको हो। 

२०७८ भदौ २ नेप्से परिसूचक हालसम्मकै उच्च ३१९९ बिन्दुमा पुगेको थियो। तर त्यसयता उतारचढावबीच घटिरहेको बजार सम्हालिन सकेको थिएन। केही दिन वृद्धितर्फ देखिए पनि स्थायी सुधारका आधारहरू भेटिएका छैनन्। 

उकालोतर्फ लाग्ने अपेक्षा गरिएको सेयर बजार कमजोर देखिइरहँदा आम लगानीकर्ता वृद्धितर्फको आशमा रहे पनि बजार बलियो सुधारतर्फ जान सकेको छैन। लामो समयदेखि बजार उतारचढावबीच २००० देखि २१०० बिन्दुकै आसपासमा छ।