काठमाडौं- साताभर उतारचढावबीच उही बिन्दु वरपर घुमिरहेको सेयर बजारमा साताको अन्तिम कारोबारमा सामान्य सुधार देखिएको छ। बिहीबार ५.६३ अंकले बढेर बजार १९६६.२३ बिन्दुमा उक्लिएको छ।

बिहीबार १ सय १५ कम्पनीको मूल्य बढ्दा बजारमा तीन अर्ब १२ करोड १२ लाख ८६ हजार रूपैयाँको कारोबार भएको छ। १ सय १५ कम्पनीको सेयर मूल्य घटेको छ भने १४ कम्पनीको सेयर मूल्यमा कुनै परिवर्तन भएन। 

लगानीकर्ताले विश्वासको आधार नभेटेको सेयर बजारमा सुधारको अपेक्षा सार्थक हुन सकिरहेको छैन। 

उतारचढावबीच लगातार ओरालो लागिरहेको सेयर बजारमा यो साता दुई कारोबार राताम्य भएर तेस्रो कारोबारमा बजार केही थामिँदै स्थिर देखिएको थियो। गएको साता समग्रमा कारोबार सुधारतर्फ देखिए पनि यो साता भने आइतबार र सोमबार नै बजार राताम्य भएको थियो। मंगलबार भने बजार केही थामिएर सामान्य वृद्धि भएको थियो।

बुधबार ०.२१ अंकले घटेर १९६०.६० बिन्दुमा झरेको बजारमा बिहीबार भने सामान्य वृद्धि भएको हो। बुधबारको तुलनामा बिहीबार कारोबार रकममा समेत वृद्धि भएको छ।

यो साता पहिलो कारोबारमा आइतबार २४.५८ अंकले घटेर १९७४.३७ बिन्दुमा झरेको थियो। सोमबार पनि १५.६२ अंकले घटेर बजार १९५८.७५ बिन्दुमा झरेको थियो। मंगलबार २.०६ अंकले बढेर बजार १९६०.८१ बिन्दुमा पुगेको थियो। 

स्थायी सुधारको आधारहरू स्पष्ट नदेखिँदा बजार अघि बढ्न धरमर गरिरहेको छ। केही संगठित लगानीकर्ताको जोडबलमा कुनै दिन वृद्धितर्फ देखिए पनि बजारले आम लगानीकर्ताको साथ पाउन सकेको देखिँदैन।

अहिलेको अवस्थामा अब ठूला लगानीकर्ताले लिने बाटो र विश्वासयोग्य वातावरणले मात्र थप सुधारको अपेक्षा गर्न सकिने विश्लेषकहरू बताउँछन्। सेयर बजारमा लामो समयदेखि कुनै दिन सामान्य वृद्धि र कुनै दिन ओरालो लाग्ने प्रक्रियाबीच उतारचढाव देखिँदै आएको छ।

सेयर बजारमा लगानीकर्ताले विश्वासको वातावरण नभेट्दा अबको बजार कता जान्छ भन्ने अनुमान गर्न मुस्किल हुने विश्लेषकहरू बताउँछन्। अब आउने समयमा पनि सेयर बजारमा उल्लेख्य वृद्धि आउने अवस्था नरहेको विश्लेषकहरू बताउँछन्। अहिले बजारमा लगानीकर्ताहरू पर्ख र हेरकै अवस्थामा रहेको उनीहरूको भनाइ छ।