काठमाडौं- नेपालको आर्थिक वृद्धिदर ३.६ प्रतिशत हुने एसियाली विकास बैंक (एडीबी) ले प्रक्षेपण गरेको छ।
समग्र दक्षिण एसियामा भने ६ प्रतिशतको वृद्धि हुने एडीबीले जनाएको छ। जसमा सबैभन्दा धेरै भारतमा ७ प्रतिशतले वृद्धि हुने प्रक्षेपण एडीबीको छ। अन्य ६ देशको सकारात्मक भएपनि अफगानिस्तानको भने शून्य हुने एडीबीले जनाएको छ।
यसअघि नेपालको आर्थिक वृद्धिदर ३.३ प्रतिशतमा सीमित हुने विश्व बैंकले प्रक्षेपण गरेको थियो।
सरकारले आर्थिक वर्ष २०८०/८१ को बजेटमार्फत ६ प्रतिशत आर्थिक वृद्धिदर हासिल गर्ने लक्ष्य राखेको थियो। तर केन्द्रीय तथ्यांक विभागले गत साता आर्थिक वर्षको दोस्रो त्रैमासमा ४ प्रतिशतको आर्थिक वृद्धिदर हासिल हुने प्रक्षेपण गरेको थियो।
अघिल्लो त्रैमासमा ३.२ प्रतिशत आर्थिक वृद्धि भएकोमा दोस्रो त्रैमासमा ४ प्रतिशत कृषि उत्पादनमा भएको वृद्धि, पर्यटन आगमनमा भएको वृद्धिसँगै होटल क्षेत्रको कुल मूल्य अभिवृद्धि प्रमुख कारण रहेको विभागले जनाएको थियो।
