काठमाडौं- सन् २०२३ मा त्रिभुवन अन्तर्राष्ट्रिय विमानस्थल हुँदै ८६ लाख ९१ हजारभन्दा बढीले हवाई यात्रा गरेका छन्। २०२३ मा अन्तर्राष्ट्रिय हवाई यात्रु संख्यामा रेकर्ड ब्रेक हुँदा आन्तरिकमा भने घटेको छ।
विमानस्थल कार्यालयका अनुसार सन् २०२३ मा अन्तर्राष्ट्रियतर्फ अहिलेसम्मकै धेरै ४५ लाख ४१ हजार एक सय ३७ जनाले हवाई यात्रा गरेका छन्। यो २०२२ को तुलनामा ३०.१८ प्रतिशत र कोविड-१९ अघि '२०१८' काे भन्दा ४.५ प्रतिशतले बढी हो।
सन् २०२३ मा अन्तर्राष्ट्रियतर्फ त्रिभुवन विमानस्थल हुँदै ३१ हजार ३ सय १२ उडान अवतरण भएका थिए भने कार्गो आवागमन २२ हजार ९ सय ४६.३७७ टन रहेको छ। उडान अवतरण गत वर्षको तुलनामा २९.४० प्रतिशतले वृद्धि हो भने कार्गो आवागमन १३.९८ प्रतिशतले घटेको विमानस्थल कार्यालयले जनाएको छ।
यस्तै आन्तरिकतर्फ एक वर्षमा ४१ लाख ५० हजार ३ सय २६ जनाले हवाई यात्रा गरेका छन्। आन्तरिकतर्फ भने २०२२ को तुलनामा ७.०७ प्रतिशतले हवाई यात्रु संख्या घटेको विमानस्थल कार्यालयले जनाएको छ।
सन् २०२३ मा ९६ हजार ९ सय ८९ आन्तरिक उडान अवतरण भएको छ, जुन २०२२ को तुलनामा १०.३६ प्रतिशतले कम हो। विमानस्थल कार्यालका अनुसार आन्तरिकतर्फ कार्गो आवागमन संख्या भने ३ हजार ४ सय २६.८६१ टन रहेको छ जुन गत वर्षको तुलनामा १०.८७ प्रतिशतले बढी हो।
सन् २०२२ मा ७९ लाख ५४ हजार ४ सय ९५ यात्रुले हवाई यात्रा गरेका थिए। समग्रमा २०२२ को तुलनामा २०२३ मा हवाई यात्रु संख्यामा ९.२ प्रतिशतले वृद्धि भएको छ भने उडान अवतरण ३ प्रतिशतले घटेको विमानस्थल कार्यालयले जनाएको छ। २०२२ मा कुल उडान अवतरण एक लाख ३२ हजार भएको थियो।
२०२३ मा आन्तरिक हवाई यात्रु घट्नुमा आर्थिक मन्दी पहिलाे कारण हाे। अर्काेतर्फ हवाई इन्धनकाे मूल्य बढ्दा हवाई भाडा बढ्नु र हवाई टिकटमा भ्याट लागु भएका कारण पनि आन्तरिक हवाई यात्रु घटेको विमानस्थल कार्यालयले जनाएकाे छ।
सन् २०२२ मा ३४ लाख ८८ हजार ३ सय २८ जना, सन् २०२१ मा १४ लाख ८२ हजार ३ सय ५, २०२० मा ११ लाख ५ हजार १ सय ५९ र २०१९ मा ४१ लाख ३८ हजार ४ सय ८२ जना यात्रुले अन्तर्राष्ट्रिय हवाई यात्रा गरेका थिए।
यस्तै आन्तरिकतर्फ २०२२ मा ४४ लाख ६६ हजार १५२ जना यात्रुले आन्तरिक हवाई यात्रा गरेका थिए जुन सन् २०२१ को भन्दा ९ लाख ५४ हजार ४३४ ले बढी थियो। सन् २०२१ मा ३५ लाख ९ हजार ७१८ जनाले आन्तरिक हवाई यात्रा गरेका थिए।
२०१९ सम्म निरन्तररुपमा बढिरहेको आन्तरिक हवाई यात्रुको संख्या २०२० मा भने ब्रेक लागेको थियो। २०२० मा कोरोनाका कारण लामो समयसम्म हवाई उडान नै ठप्प भएको थियो। २०२० मा जम्मा १४ लाख ५७ हजार ५ सय ३९ जनाले मात्रै आन्तरिक हवाई यात्रा गरेका थिए भने २०१९ मा ३१ लाख ८८ हजार ४ सय ७९ आन्तरिक यात्रु संख्या थियो।
