काठमाडौं- संगठित अपराध र ठगी मुद्धामा मुछिएका सिभिल ग्रुपका अध्यक्ष इच्छाराज तामाङविरुद्ध १ हजार ४ सय ९९ जनाले किटानी जाहेरी दिएका छन्।
तामाङलाई गत असोज १८ गते प्रहरीले रकम हिनामिना गरी ठगी गरेको भन्दै पक्राउ गरेयता ठगीमा परेकालाई उजुरीका लागि आउन आह्वान गरेको थियो। त्यसयता प्रहरीको केन्द्रीय अनुसन्धान ब्यूरो (सीआईबी) पुगेर तामाङबाट ठगिएको भन्दै जाेहरी दिनेको संख्या बढीरहेको छ।
सीआईबीले अनुसन्धान पूरा गरेर सरकारी वकिलको कार्यालयमा गएको बिहीबार नै प्रतिवेदन बुझाइसकेको छ। प्रहरीले बिहीबार बुझाएको प्रतिवेदनमा ८ वर्ष कैद र बिगो बराबर ५ अर्ब ५९ करोड जरिवाना माग गर्नुपर्ने सुझाव दिइएको छ। प्रतिवेदन बुझाइसकेपछि पनि थप केहीको जाहेरी आउँदा उनीविरुद्ध उजुरी दिनेको संख्या १ हजार ४ सय ९९ पुगेको हो।
अनुसन्धान सकेर सरकारी वकिलको कार्यालयमा प्रतिवेद बुझाइसके पनि थप जाहेरी आएको र जाहेरी दिनेको संख्या अझ बढ्न सक्ने देखिएकाले थप अनुसन्धान गरिने सीआईबीले जनाएको छ।
