काठमाडौं- सेयर बजार मंगलबारको वृद्धिपछि बुधबार पनि वृद्धितर्फ नै साथ मिल्नेगरी सामान्य अंकले बढेको छ। लगातार उतारचढावमा रहँदै यो साता आइतबार सकारात्मक सर्किट लागेको बजारले उचाइतर्फकै संकेत गरिरहेको छ। 

बुधबार २.६० अंकले बढेर बजार १९८८.०४ बिन्दुमा पुगेको छ। १३४ कम्पनीको सेयर मूल्य बढेको बजारमा ३ अर्ब ९० करोड ९१ लाख ९८ हजार रुपैयाँको कारोबार भएको छ। एकसय कम्पनीको सेयर मूल्य घटेको छ भने ७ कम्पनीको मूल्यमा परिवर्तन भएको छैन। 

यो साता आइतबार १११.२० अंकले बढेको सेयर बजार सोमबार थामिएर मंगलबार पुन: वृद्धितर्फ लागेको थियो। सोमबार १५.४० अंकले घटेको बजार मंगलबार ३६.८६ अंकले बढेर बजार १९८५.४४ बिन्दुमा पुगेको थियो।

लामो समय ओरालो लाग्दै कमजोर बनिरहेको बजार मौद्रिक नीतिको पहिलो त्रैमासिक समीक्षापछि उचालिएको हो। स्थायी सुधारको आधार पर्खिरहेका लगानीकर्ता मौद्रिक नीतिको समीक्षामार्फत हुने व्यवस्थाको पर्खाइमा थिए। 

नेपाल राष्ट्र बैंक चालु आर्थिक वर्षको मौद्रिक नीतिको पहिलो त्रैमासिक समीक्षामा सेयर कर्जामा नरम देखिएसँगै दोस्रो बजार आइतबार सकारात्मक बनेको थियो। सोमबार करेक्सन देखिए पनि बजारले मंगलबार गति देखाउँदै बुधबार पनि हरियाली नै लिएको छ। अब बजार विस्तारै उचाइतर्फ नै लाग्ने विश्लेषकहरू बताउँछन्। 

२०७८ भदौ २ गते ३१९९ को उच्च बिन्दुमा पुगेर घटेको बजार अहिले पुनः १९०० वरपर घुमेर बसिरहेको थियो। केही ठूला लगानीकर्ताको वरपर देखिने गरेको बजार उतारचढावले उही बिन्दुवरपर तलमाथि भइरहँदा अब भने पुन: उचाइतर्फको संकेत गरेको छ। अहिलेको बजारको अवस्था मौसमी हो या बजारले सही बाटो समात्न लागेको हो भन्ने यकिन गर्न भने समय लाग्ने विश्लेषकहरू बताउँछन्।