काठमाडौं- निजी क्षेत्रको पहलमा स्थापना भएको सबैभन्दा ठूलो कृषि वस्तु वेयरहाउस नेपाल वेयरहाउस कम्पनीले मंसिर १३ गतेदेखि सर्वसाधारणका लागि सेयर जारी गर्ने भएको छ।
प्रतिकित्ता सय रुपैयाँ मूल्यमा ११ लाख ४१ लाख २५० कित्ता सेयर सर्वसाधारणका लागि जारी हुन लागेको हो।
कूल १३ लाख ७५ हजार कित्ता सेयर निष्काशनको अनुमति पाएको कम्पनीले यसअघि नै वैदेशिक रोजगारीमा रहेका नेपाली, कर्मचारी तथा संस्थागत लगानीकर्ताका लागि निष्काशन गरिसकेको छ।
हिमालयन क्यापिटल लिमिटेड धितोपत्र प्रबन्ध रहेको यो कम्पनीको वित्तीय वित्तीय अवस्थालाई इन्फोमेरिक्स नेपालले बी मानइनस रेटिङ दिएको छ।
नेपालका तीन जिल्लामा भण्डारण केन्द्र सञ्चालन गर्नेगरि स्थापना भएको कम्पनीले अहिले एउटा युनिट सञ्चालनमा ल्याइसकेको छ।
कृषिजन्य वस्तुको उत्पादन तथा वितरणमा प्रतिष्ठा आर्जन गरेको निम्बस समूहको अग्रस्तामा स्थापना भएको यो कम्पनीले सुनसरी, पर्सा तथा कपिलवस्तुमा वेयरहाउस सञ्चालनमा ल्याउने छ।
१ अर्ब ६५ करोड लागत अनुमान गरिएको यो परियोजना सम्पन्न भएपछि ५५ हजार टन भण्डारण क्षमता हुनेछ। सुनसरीमा १५ हजार टन क्षमताको वेयरहाउस निर्माण भएर सञ्चालनमा आइसकेको छ।
त्यस्तै पर्सामा २५ हजार टन क्षमताको वेयरहाउस निर्माण सम्पन्न भएर उपकरण जडानको काम भइरहेको छ। कपिलवस्तुमा पनि १५ हजार टन क्षमताको निर्माण कार्य अन्तिम चरणमा रहेको कम्पनीले जानकारी दिएको छ।
कम्पनीले निर्माण गर्ने वेयरहाउसमा सुरुवाति चरणमा गहुँ र मकैमात्र भण्डारण हुने छ। अहिले निर्माण भएको पूर्वाधारले यसकै लागिमात्र काम गर्ने तर भविष्यमा माग भएबमोजिमका बाली भण्डारणका सुविधा थप गर्दै जाने कम्पनीले जानकारी दिएको छ।
वेयरहाउसमा किसान तथा व्यवासयीहरूले आफ्नो उत्पादन भण्डारण गर्नसक्छन्। निश्चित शुल्क तिरेर भण्डारण गरेर बजारमा भाउ बढ्ने बेला बिक्री गर्ने अवसर पाउँछन्। भण्डारणमा राखिएको उत्पादनका आधारमा वेयरहाउस रिसिप्ट फाइनान्सिङ सुविधा लगायतका सुविधा दिने कम्पनीले जानकारी दिएको छ।
उत्पादनको समयमा बजारमा भाउ नपाइने तर सुविधासम्पन्न भण्डारणको सुविधा नहुने भएकाले न्यून मूल्यमा बिक्री गर्न किसानहरू बाध्य हुन्छन्। यही बाध्यता अन्त्य गर्नका लागि वेयरहाउस सञ्चालनमा ल्याइएको कम्पनीले उल्लेख गरेको छ।
यो कम्पनीमा यसमा २३ जना प्रबर्द्धक रहेका छन्। निम्बस समूह यसको मुख्य प्रबर्द्धक हो। कम्पनीमा निम्बसको ३६ प्रतिशत सेयर रहेको छ। त्यस्तै प्रोबायोटिको २८ प्रतिशत छ। यसमा एनएमबी बैंकको ३.६४ प्रतिशत, नेपाल पूर्वाधार विकास बैंकले ९.०९ प्रतिशत, शिखर इन्स्योरेन्सले १०.९१ प्रतिशत र आईएमई जेनरल इन्स्योरेन्सको ३.६४ प्रतिशत रहेको छ।
आनन्दकुमार अग्रवाल(बगरिया) अध्यक्ष रहेको यो कम्पनीको अवस्थितिको रणनीतिक लाभ धेरै हुने रेटिङ कम्पनीले उल्लेख गरेको छ। मधेस तथा लुम्बनी प्रदेशका धेरै उत्पादन हुने जिल्लामा हुने भण्डारण केन्द्रले पर्याप्त व्यापार पाउने छ।
नेपालकै पहिलो सार्वजनिक कृषि वस्तु वेयरहाउसले आधुनिक प्रविधिसहितको सुविधा दिने उल्लेख गरेको छ। प्रविधिसँगै सुविधाले पनि किसान तथा उत्पादकहरूलाई आकर्षित गर्ने कम्पनीको विश्वास छ।
