काठमाडौं- रेमिट्यान्स आम्दानीमा कीर्तिमान कायम भएको छ। चालु आवको असोज महिनामा मात्रै १ खर्ब ३६ अर्ब ९७ करोड रुपैयाँ रेमिट्यान्स भित्रिएको छ।
चालु आवको साउनमा १ खर्ब १६ अर्ब र भदौ १ अर्ब १२ अर्ब रेमिट्यान्स भित्रिएको थियो। असोज महिनामा भित्रिएको रेमिट्यान्स रकम नेपालको इतिहास एक महिनामा भित्रिएको सबैभन्दा बढी हो।
समीक्षा अवधिमा विप्रेषण आप्रवाह ३०.० प्रतिशतले वृद्धि भइ ३ खर्ब ६५ अर्ब ३४ करोड पुगेको छ। अघिल्लो वर्षको सोही अवधिमा विप्रेषण आप्रवाह १६.८ प्रतिशतले बढेको थियो।
अमेरिकी डलरमा विप्रेषण आप्रवाह २५.९ प्रतिशतले वृद्धि भइ २ अर्ब ७६ करोड पुगेको छ। अघिल्लो वर्ष यस्तो आप्रवाह ७.९ प्रतिशतले बढेको थियो।
सोही अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ) लिने नेपालीको संख्या १ लाख १३ हजार ३ सय ९७ र पुनः श्रम स्वीकृति लिनेको संख्या ४९ हजार २ सय ९७ रहेको छ।
