काठमाडौं- चन्द्रागिरी हिल्स लिमिटेडको सेयर मूल्यमा उछाल आएको छ। समग्र सेयर बजार घट्दा पनि चन्द्रागिरीको सेयर मूल्य बिहीबार प्रतिकित्ता ६४ रुपैयाँले बढेको छ।

गत वर्ष १५ करोड ११ लाख रुपैयाँ खुद नाफा आर्जन गरेको कम्पनीले लाभांश दिने अनुमानमा सेयर मूल्यमा उछाल आएको छ। कम्पनीको सेयर मूल्य न्यून हुँदा ९ सय ७८ रुपैयाँ थियो। पछिल्लो ५२ हप्तामा सेयर मूल्य बढेर १५२० रुपैयाँसम्म पुगेको थियो। बिहीबार सेयर मूल्य १ हजार १ सय २४ रुपैयाँमा कारोबार भएको छ। अन्य कम्पनीको सेयर मूल्य लगातार घटेर न्यून हुँदा चन्द्रागिरी हिल्सको भने खासै घटेको छैन।

गत आर्थिक वर्षको अन्त्यसम्ममा कम्पनीले १५ करोड ११ लाख रुपैयाँ खुद नाफा आर्जन गरेको थियो। यो अघिल्लो आर्थिक वर्षको सोही अवधिको तुलनामा ७९६.४१ प्रतिशत बढी हो। अघिल्लो आर्थिक वर्षको सोही अवधिसम्ममा कम्पनीले १ करोड ६८ लाख रुपैयाँ खुद नाफा आर्जन गरेको थियो।

बाह्य तथा आन्तरिक पर्यटकहरूको आगमनमा उल्लेख्य सुधार भएपछि कम्पनीको आम्दानी बढ्न गई खुद नाफा बढ्न पुगेको थियो। आउने वर्षहरुमा झनै बढ्ने अनुमान गरिएको छ।

समीक्षा अवधिमा कम्पनीको सञ्चालन आदानी ३६.५४ प्रतिशत बढेर ९१ करोड ३४ लाख रुपैयाँ पुगेको छ। त्यसैगरी कम्पनीको कुल आम्दानी ४०.५२ प्रतिशत बढेर ७९ करोड २६ लाख रुपैयाँ पुगेको छ।