काठमाडौं- लगानीकर्ताका लागि लाभांश र लगानीका हिसावले सुरक्षित वाणिज्य बैंकहरुको लाभांश धमाधम आउँदैछ। दसैँअघि २० वाणिज्य बैंकमध्ये ६ वटाले घोषणा गरेर कतिपयले लाभांश वितरणसमेत गरिसकेका छन्।
लाभांश घोषणा गरेका ६ वटा वाणिज्य बैंकमध्ये एनआईसी एसिया बैंकले सबैभन्दा बढी लाभांश आफ्ना लगानीकर्तालाई दिने घोषणा गरेको छ। यसले ३०.५२ प्रतिशत लाभांश दिने घोषणा गरेको छ। बैंकले २९ प्रतिशत बोनस र १.५२ प्रतिशत नगद लाभांश घोषणा गरेको हो।
यस्तै एभरेष्ट बैंकको १० प्रतिशत बोनस र १०.५३ प्रतिशत नगदसहित कुल २०.५३ प्रतिशत लाभांश लगानीकर्ताको खातामा गइसकेको छ। लाभांश घोषणा गरेका बैंकहरुको सूचीमा सानिमा बैंक, माछापुच्छ्रे बैंक, सिटिजन्स बैंक र सिद्धार्थ बैंक पनि छन्।
सानिमा बैंकले ९ प्रतिशत बोनस र ५.७० प्रतिशत नगद गरी कुल १४.७० प्रतिशत लाभांश घोषणा गरेको छ। यस्तै माछापुच्छ्रे बैंकले १४ प्रतिशत लाभांश घोषणा गरेको छ, जसअन्तर्गत १३.३० प्रतिशत बोनस र ०.७० प्रतिशत नगद रहेको छ।
सिटिजन्स बैंक र सिद्धार्थ बैंकले क्रमश: ५.७९ प्रतिशत र ४.२१ प्रतिशत लाभांश घोषणा गरेका छन्। तिहारसम्ममा नबिल, ग्लोबल आईएमई, एसबीआई, एनएमबि, चार्टर्ड स्ट्यान्डर्ड, कुमारीसहित १४ बैंकहरुले लाभांश घोषणाको तयारी गरेका छन्।
