काठमाडौं- लामो समयदेखि रोकिएको स्वीजरल्याण्ड र रुवान्डासँगको दुईपक्षीय हवाई सम्झौताका लागि बाटो खुलेको छ। संस्कृति, पर्यटन तथा नागरिक उड्डयन मन्त्रालयको प्रस्तावमा मन्त्रिपरिषद्को बैठकले स्वीजरल्याण्ड र रुवान्डासँगको दुईपक्षीय छलफल तथा हवाई सम्झौताका लागि स्वीकृति प्रदान गरेको छ।
मन्त्रालयले स्वीजरल्याण्ड र रुवान्डासँग दुईपक्षीय हवाई सम्झौता गर्ने तयारी अन्तिम चरणमा पुर्याउँदै स्वीकृतिका लागि सहमति मागेको थियो। त्रिभुवन अन्तर्राष्ट्रिय विमानस्थलसँगै गौतम बुद्ध अन्तर्राष्ट्रिय विमानस्थल र पोखरा विमानस्थलमा समेत उडान गर्न पाउने गरी हवाई सम्झौता हुने मन्त्रालयले जनाएको छ।
दुवै देशसँग सातामा २८ वटा उडान गर्ने र आधा उडान काठमाडौं बाहिरको विमानस्थलबाट हुने गरी हवाई सम्झौता हुन लागेको मन्त्रालयले जनाएको छ।
