धुलिखेल-सरल कर्जा उपलब्ध गराउने भन्दै वाणिज्य बैंकहरु स्थानीय तह धाउन थालेका छन् । उद्यमशीलताको विकास एवं प्रवर्द्धन गर्ने उद्देश्य राख्दै बैंकहरूले काभ्रेपलाञ्चोकको स्थानीय तहका जनप्रतिनिधिसँग सम्झौता थालेका हुन् ।
यही भदौ ११ गते नबिल बैंकले पनौती नगरपालिका र पाँचखाल नगरपालिकासँग एकैदिन स्थानीय जनप्रतिनिधिसँग सरल कर्जा लगानी गर्नका लागि विभिन्न शर्त राखी सम्झौता गरेको थियो। पाँचखाल नगरले वित्तीय संस्थासँगका सम्झौता निकै उपलब्धि हुने मानेको छ । उद्यम गर्न चाहने स्थानीयवासीका लागि नगरको सिफारिसमा सहजरूपमा सरल ऋण उपलब्ध गराउने उद्देश्यले नबिल बैंकसँग सम्झौतापत्रमा दुई पक्षबीच हस्ताक्षर भएको थियो ।
'वित्तीय संस्थासँग लगानीका क्षेत्रमा सम्झौता गर्नु निकै राम्रो हो, नगर विकास, उद्यमशीलता र रोजगारीमा बैंकसँग हातेमालो गर्दै जानेछौँ' नगरप्रमुख महेश खरेलले भने।
उनका अनुसार उद्यम गर्न चाहनेलाई आह्वान गरी तालिम तथा अभिमुखीकरण गराएर उद्यमशीलतामा आकर्षण गर्ने उद्देश्य उल्लेख गरिएको छ । उद्यम गर्न चाहनेले स्थानीय तहको सिफारिस लिनुपर्ने नीति बनाइएको छ ।
बैंकका बागमती प्रदेश प्रमुख अमित श्रेष्ठले सरकारको दिगो विकास लक्ष्यलाई सहयोग गर्न गत असारमा विपन्न वर्ग लक्षित किसान कर्जा र उद्यमशीलताका लागि दिगो बैंकिङ कार्यक्रम सार्वजनिक गरिएको बताए।
यस्तै इन्फ्रास्टक्चर बैंक लिमिटेड गत साउन दोस्रो साता पाँचखाल नगरलाई 'स्मार्ट सिटी' बनाउने योजनामा लगानी गर्न सात शर्त राखेर सम्झौता गरेको थियो । सार्वजनिक–नीजि साझेदारीमा (सबल, सक्षम, समावेशी र समृद्ध पूर्वाधार) परियोजनामा लगानी, निर्माण एवं सञ्चालन गर्ने समझदारीपत्रमा हस्ताक्षर गरिएको थियो । नगरप्रमुख महेश खरेल र बैंकका कार्यकारी अधिकृत रामकृष्ण खतिवडाद्वारा हस्ताक्षरित सम्झौतामा स्मार्ट सिटीका लागि व्यवस्थित गर्नुपर्ने पूर्वाधारलगायत निजी–साझेदारी माध्यमबाट नगरलाई स्मार्ट बनाउने विषयमा सात बुँदे सम्झौता गरिएको हो ।
रासस
