काठमाडौं- एनआईसी एसिया बैंकको शुक्रबार बसेको सञ्चालक समितिको बैठकले गएको वर्षको नाफाबाट २९ प्रतिशत बोनस सेयर र कर प्रयोजनका लागि १.५२ प्रतिशत नगद लाभांश गरी कुल ३०.५२ प्रतिशत लाभांश वितरणको प्रस्ताव गरेको छ।
बैंकले विगत २ वर्षसम्म लगानीकर्तालाई लाभांश वितरण गरेको थिएन। विगत दुई आर्थिक वर्षहरूमा न्यूनतम पुँजीकोष अनुपात कायम गर्न नसक्दा राष्ट्र बैंकले लाभांश वितरणमा रोक लगाएको थियो।
गत आर्थिक वर्ष बैंकले ४ अर्ब ६५ करोड नाफा गरेको थियो। नाफा नोक्सान बाँडफाँट हिसाब खातामा राष्ट्र बैंकले तोकेको मापदण्डअनुसार जेगडा कोषमाहरूमा रकम जम्मा गरेपछि बैंकको वितरणयोग्य मुनाफा ३ अर्ब ७० करोड रुपैयाँ रहेको थियो। वितरणयोग्य नाफामध्ये १७ करोड रुपैयाँ सञ्चिति कोषमा राखेर बाँकी ३ अर्ब ५३ करोड ६४ हजार रुपैयाँ लाभांशका लागि प्रस्ताव गरेको छ।
यस बैंकले आर्थिक वर्ष २०७६/७७ मा यस बैंकले २० प्रतिशत लाभांश दिएको थियो। यस्तै आर्थिक वर्ष २०७५/७६ मा २१.०५ प्रतिशत, आर्थिक वर्ष २०७४/७५ मा १०.५२ प्रतिशत, आर्थिक वर्ष २०७३/७४ मा २१.०५ प्रतिशत, आर्थिक वर्ष २०७२/७३ मा २७.३७ प्रतिशत, आर्थिक वर्ष २०७१/७२ मा ४१.०५ प्रतिशत, आर्थिक वर्ष २०७०/७१ मा ३० प्रतिशत र आर्थिक वर्ष २०६९/७० मा २० प्रतिशत लाभांश वितरण गरेको थियो।
