काठमाडौं- नेपाल पुनर्बिमाका प्रमुख कार्यकारी अधिकृत शंकरमान रायमाझीले हिमालय इन्स्योरेन्सका अध्यक्षलाई चुनौती दिएका छन्। 

१० औँ कर दिवसको अवसरमा आयोजित कार्यक्रममा बोल्दै रायमाझीले हिमालय रि- इन्स्योरेन्सलाई एक नम्बर बन्न नदिने बताएका छन्। 

'हामी निरन्तर एक नम्बरमा छौँ। त्यसैले धेरै कर तिर्दै आएका छौँ। अब पनि हामी एक नम्बर बनिरहन्छौँ' उनले भने' अब अर्को पुनर्बिमा कम्पनी पनि आएको छ। तर हामी उछिन्न दिँदैनौँ।' 

गोल्छासमेत सहभागी कार्यक्रममा बोल्दै रायमाझीले गोल्छाप्रति इंगित गर्दै हिमालयलाई उछिन्न नदिने बताएका हुन्।

'अर्को पुनर्बिमा कम्पनीका अध्यक्ष शेखर गोल्छा जी यही हुनुहुन्छ। व्यक्तिगत रुपमा नलिनुहोला। तर हामी यति राम्रो काम गर्छौं कि अरुलाई उछिन्नै दिँदैनौँ' उनले भने। 

बीमा व्यवसाय गर्ने कम्पनीमध्येबाट सबैभन्दा धेरै आयकर बुझाएको भन्दै नेपाल पुनर्बिमालाई आन्तरिक राजस्व विभागले सम्मान गरेको थियो। उक्त सम्मानपछि कार्यक्रममा बोल्दै रायमाझीले आफूहरूले अहिलेको अब्बल कामलाई निरन्तरता दिन प्रतिबद्ध रहेको जानकारी दिए।