काठमाडौं- पशुपति क्षेत्र विकास कोषले वनकाली पार्किङको ठेक्का रद्द गरेको छ। बिहीबार संस्कृति, पर्यटन तथा नागरिक उड्डयन मन्त्रलयमा बसेको विकास कोषको बैठकले तत्व इन्भेष्टमेन्ट एण्ड सर्भिस प्रालिले सम्झौता पालना नगरेको भन्दै उक्त कम्पनीसँगको पार्किङ ठेक्का रद्द गर्ने निर्णय गरेको हो।

सम्झौताअनुसार पशुपति क्षेत्रअन्तर्गत वनकाली ओरालो क्षेत्रमा रहेको पार्किङको मासिक चार लाख ८३ हजार ३३ रूपैयाँ पशुपति क्षेत्र विकास कोषलाई भुक्तानी गर्नुपर्ने थियो। तर कम्पनीले सम्झौताबमोजिम समयमै बक्यौता नबुझाउनुका साथै अन्य थुप्रै नियम उल्लंघन गरेको कोषले जनाएको छ।

कोषले बाँकी रहेको बक्यौता एक महिनाभित्र उठाउने निर्णय पनि गरेको छ। ठेकेदार कम्पनी तत्व इन्भेष्टमेन्टको बैंक ग्यारेन्टीसमेत जफत गर्ने निर्णय पनि कोषको बिहीबारको बैठकले गरेको छ।

ठेक्काको सम्झौताको शर्त नं. ६ मा 'बढीमा ३ महिनासम्मको भाडा तिर्न बाँकी राखेमा स्वतः कोषले सम्झौता रद्द गर्न सक्नेछ। तोकिएको समयमा भाडा नबुझाएमा सम्झौता रद्द गरी धरौटी रकमसमेत जफत गरी अन्य व्यवस्थाबाट पार्किङ सञ्चालन गरिनेछ' भन्ने कुरा उल्लेख छ। सोहीबमोजिम ठेक्का रद्द गरिएको हो।

कोषको आर्थिक प्रशासन शाखामा रहेको विवरणअनुसार हालको मितिसम्म उक्त कम्पनीले कोषलाई बुझाउन बाँकी भाडा ३४ लाख ७४ हजार एक सय ११९ देखिएको छ।