काठमाडौं- पहिलो चरणको आईपीओ बाँडफाँटपछि हाथवे इन्भेष्टमेन्ट नेपाल लिमिटेडले दोस्रो चरणमा सर्वसाधारणका लागि आईपीओ निष्कासन तथा बिक्री खुला गरेको छ।
कम्पनीले बिहीबारदेखि सर्वसाधारणका लागि प्रतिकित्ता ५० रूपैयाँका दरले आईपीओ निष्कासन गरेको हो। १२ करोड १३ लाख ८७ हजार ५०० रूपैयाँ बराबरको २४ लाख २७ हजार ७५० कित्ता सेयर सर्वसाधारणका लागि कम्पनीले निष्कासन गरेको हो।
कम्पनीको आईपीओमा न्यूनतम २० र अधिकतम एक लाख कित्तासम्म आवेदन दिन सकिनेछ।
.jpg)
आईपीओमा भदौ २५ गतेसम्म आवेदन दिन सकिने कम्पनीले जनाएको छ। उक्त समयसम्म सम्पूर्ण कित्ताका लागि आवेदन नपरेमा निष्कासन अवधि असोज ४ गतेसम्म लम्बिनेछ।
कम्पनीको सेयर निष्कासन तथा बिक्री प्रबन्धक ग्लोबल आइएमई क्यापिटल लिमिटेड रहेको छ।
कम्पनीले जारी पुँजी १ अर्ब १७ करोड रूपैयाँको १२.५० प्रतिशतका दरले हुन आउने १४ करोड ६२ लाख ५० हजार रूपैयाँ बराबरको प्रतिकित्ता ५० रूपैयाँ अंकित मूल्यका २९ लाख २५ हजार कित्ता सेयर निष्कासन गर्ने अनुमति पाएको थियो।
सोमध्ये कम्पनीले पहिलो चरणमा नेपाल सरकारको सम्बन्धित निकायको श्रम स्वीकृति लिई वैदेशिक रोजगारीमा रहेका नेपालीहरूका लागि १ करोड ४६ लाख २५ हजार रूपैयाँ बराबरको २ लाख ९२ हजार ५०० कित्ता सेयर निष्कासन गरी बाँडफाँट समेत गरिसकेको छ।
त्यसैगरी, कम्पनीले २९ लाख २५ हजार रूपैयाँ बराबरको ५८ हजार ५०० कित्ता सेयर आफ्ना कर्मचारीहरूका लागि र ७३ लाख १२ हजार ५०० रूपैयाँ बराबरको १ लाख ४६ हजार २५० कित्ता सेयर सामूहिक लगानी कोषका लागि निष्कासन गरिसकेको छ।
