काठमाडौं- वडा कार्यालयको भवन निर्माणका लागि दानमा प्राप्त जग्गा खरिद गरेको भन्दै भुक्तानी लिने प्रमुख प्रशासकीय अधिकृतसहित ३ जनाविरुद्ध अख्तियार दुरुपयोग अनुसन्धान आयोगले मुद्दा दायर गरेको छ।

सोलुखुम्बुको लिखुपिके गाउँपालिकाका तत्कालीन प्रमुख प्रशासकीय अधिकृत राजेन्द्र भण्डारी, वडा नं. २ का तत्कालीन वडाध्यक्ष रमेश कुमार बस्नेत र तत्कालीन लेखापाल जीवन सुवेदीविरुद्ध अख्तियारले आइतबार विशेष अदालत काठमाडौंमा मुद्दा दायर गरेको हो।

निःशुल्क रुपमा दानपत्रमार्फत प्राप्त भएको जग्गालाई ६ लाख रूपैयाँमा खरिद गरेको वडाध्यक्ष बस्नेतले भुक्तानीका लागि गाउँपालिकामा पेस गरेको र दानको जग्गा भन्ने थाहा हुँदाहुँदै तत्कालीन अधिकृत भण्डारी र लेखापाल सुवेदीले दानपत्रबाट जग्गा रजिष्ट्रेसन पास भएको कागजात देखिँदासमेत जग्गा खरिद गरेको भनी झुटो विवरण उल्लेख गरी भुक्तानी लिइ दिएको अख्तियारको अनुसन्धानबाट खुलेको छ।

उनीहरुविद्ध ६ लाख रूपैयाँ बिगो कायम गरी भ्रष्टाचार निवारण ऐन, २०५९ को दफा ८ को उपदफा (१) बमोजिमको सजाय मागदाबी गर्दै मुद्दा दायर गरिएको अख्तियारले जनाएको छ।