काठमाडौं- प्रधानमन्त्री शेरबहादुर देउवाले विद्युत खपत बढाउन इन्डक्सन चुलाे र इलेक्ट्रिक गाडीमा अनुदान बढाउने बताएका छन्। उनले देशभित्र उत्पादित विद्युत देशभित्रै खपत हुने गरी काम गर्नुपर्ने बताए।
'नेपालको विद्युत भारतले किनिदिएन भने के गर्ने? हाम्रो देशको यति धेरै बिजुली छ। भारतले किन्छ भन्ने छैन,' उनले भने, 'नेपालको विद्युत नेपालमै खपत गर्नुपर्छ' प्रधानमन्त्री देवाले भने।
स्वतन्त्र ऊर्जा उत्पादकहरुकाे संस्था (ईपान) काे २०औं साधारणसभामा प्रधानमन्त्री देउवाले इलेक्ट्रिक गाडीका साथै इलेक्ट्रिक चुल्होलगायतमा अनुदान दिन सरकार तयार रहेको बताएका हुन्।
‘हामीले किन यो ग्यासको चुल्हो बाल्ने? हामीसँग यति विद्युत छ कि हामी व्याट्रीबाट गाडी चलाउन सक्छौँ। बस चलाउन सक्दछौँ। हाम्रो चुल्हो पनि इलेक्ट्रिक चुल्हो हुन सक्दछ। तपाईंहरू लाग्नुस्, अनुदान दिन तयार छौँ' प्रधानमन्त्री देउवाले भने।
काठमाडौंमा धुवाँ र धुलो बढेकाले काठमाडौंबाट विद्युतीय बस सञ्चालन सुरु गरेर देशैभर विस्तार गर्न लागिएकाेसमेत प्रधानमन्त्री देउवाले बताए।
सरकारले उपत्यकामा सञ्चालन गर्नका लागि तीन सय वटा विद्युतीय बस खरिद प्रक्रिया अघि बढाएकाेले देशैभर विद्युतीय गाडी चलाउन पहल र सहजीकरण गरिने उनले बताए।
