काठमाडौं-  आर्थिक वर्ष २०७९/८० मा ६ लाख १३ हजार ४८३ जनाले व्यक्तिगत स्थायी लेखा नम्बर लिएका छन्। 

आन्तरिक राजस्व विभागका अनुसार एक वर्षमा व्यक्तिगत प्यान नम्बर लिनेको संख्या अघिल्लो वर्षको तुलनामा बढेको छ। आर्थिक वर्ष २०७८/७९ मा यस्तो नम्बर दर्ता ५ लाख ९६ हजार ३७२ रहेको थियो। 

गएको वर्षको अन्त्यसँगै कूल ३६ लाख ६३ हजार ७८७ व्यक्तिगत प्यान नम्बर वितरण भएको छ। 

व्यक्तिगत प्यान नम्बर दर्ता अघिल्लो वर्षको तुलनामा गत वर्ष बढेपनि व्यावसायिक प्यान नम्बर दर्ता भने घटेको छ। विभागका अनुसार गएको वर्ष १ लाख ४२ हजार ६९९ व्यावसायिक प्यान दर्ता भएका छन्। अघिल्लो वर्ष २ लाख ११ हजार ८६६ नम्बर दर्ता भएका थिए। 

त्यस्तै भ्याटमा दर्ता हुनेको संख्या पनि गत वर्ष घटेको छ। अघिल्लो वर्ष ३१ हजार दर्ता भएकोमा गएको वर्ष २४ हजार भ्याटमा आएका छन्। योसँगै भ्याटमा दर्ता हुनेको स्ख्या ३ लाख नाघेको छ।