काठमाडौं- बीमा समितिले दुर्घटना बीमा निर्देशिका २०७८ जारी गरेको छ। निर्देशिका अनुसार छोटो अवधीका लागि पनि बीमा गर्न पाउने व्यवस्था गरेको छ।
निर्जीवन बीमा कम्पनीहरुले छोटो अवधिको लागि बीमालेख जारी गर्न सक्ने व्यवस्था गरिएको छ। छोटो अवधिका बीमालेखमा लाग्ने बीमाशुल्क समेत अलग अलग हुनेछ।
निर्देशिका अनुसार एक महिनासम्मको लागि वार्षिक बीमाशुल्कको २५ प्रतिशत, एकदेखि ३ महिनाको लागि ५० प्रतिशत, ३ देखि ६ महिनाको लागि ६० प्रतिशत र ६ देखि १ वर्ष सम्मको लागि शत प्रतिशत बीमाशुल्क लाग्नेछ। समितिले दुर्घटना बीमाको स्तरीकृत बीमालेख तयारी गरी त्यसको लागि आवश्यक पर्ने बीमादर समेत निर्धारण गरी प्रचलनमा ल्याउन बीमा ऐन अनुसार निर्देशिका जारी गरेको हो।
निर्देशिका अनुसार दुर्घटना बीमालेख एक वर्ष वा सो भन्दा कम अवधिको लागि मात्रै जारी हुनेछ। बीमालेख जारी गर्दा जारी भएको समय तथा जोखिम प्रारम्भ भएको मिति,घण्टा र मिनेट सहित उल्लेख गर्नुपर्ने व्यवस्था छ।
यस्तो बीमालेख जोखिम प्रारम्भ भएको अर्को वर्ष सोही मितिको अघिल्लो मध्यरात १२ बजे बीमा अवधि समाप्त हुनेछ।
व्यक्तिगत दुर्घटना बीमाको लागि न्युनतम बीमादर प्रतिव्यक्ति प्रतिहजार न्युनतम २ रुपैयाँ हुनेछ।
यस्तै सामुहिक दुर्घटना बीमा अन्तर्गत दुई देखि २५ जना सम्मको लागि प्रतिव्यक्ति प्रतिहजार २ रुपैयाँ, २६ जना देखि १०० सम्मको लागि प्रति व्यक्ति प्रतिहजार १ रुपैयाँ ७५ पैसा, १०० भन्दा बढीको लागि प्रति व्यक्ति प्रतिहजार न्युनतम १ रुपैयाँ ५० पैसा बीमादर तोकिएको छ।
