काठमाडौं- राष्ट्रिय वनबाट निकालिने खनिजजन्य वन पैदावार बापत वातावरणीय सेवा शुल्क डिभिजन वन कार्यालयमार्फत कोषमा बुझाउनु पर्ने रकम १५ प्रतिशतले घटाइएको छ।
वन नियमावली २०७९ को पहिलो संशोधन गर्दै सरकारले राष्ट्रिय वनबाट निकालिने खनिजजन्य वन पैदावारको हकमा प्रचलित खानी तथा खनिज पदार्थ सम्बन्धी ऐन तथा नियमावली तोकिए बमोजिमको मूल्य रकम खानी तथा भूगर्भ विभागमा बुझाउनु पर्ने र सो रकमको थप दश प्रतिशत रकम वातावरणीय सेवा शुल्क बापत खानी भूगर्भ विभाग मार्फत वन विकास कोषमा जम्मा गर्नु पर्ने व्यवस्था गरिएको छ। यसअघि वातावरणीय शुल्क २५ प्रतिशत रहेको थियो।
यसैगरी खानी सञ्चालन लागि वनक्षेत्र र निजी जग्गा छुट्याउँदा वन क्षेत्रको सिमानाबाट निजी जग्गा कम्तीमा ५० मिटरको मध्यवर्ती क्षेत्र (बफर जोन) राखेर मात्र खानी सञ्चालन गर्नु पर्ने व्यवस्थामा पनि परिवर्तन गरेर १० मिटर कायम गरिएको छ।
त्यस्तै वन नियमावलीमा संशोधन गर्दै वन, वन्यजन्तु, वनस्पति, जैविक विविधताको सुरक्षाको लागि वनक्षेत्रभित्र सुरक्षाकर्मी बस्ने वा वन कार्यालयको निमित्त आवश्यक पर्ने स्थायी भवन निर्माण गर्नु पर्ने भएमा मन्त्रालयको स्वीकृत लिइ निर्माण गर्न सकिने व्यवस्था गरेको छ।
.jpg)
