काठमाडौं- निरन्तर उतारचढावमा देखिएको सेयर बजार लगातार ओरालोतिर लागेको छ। यो साता पहिलो कारोबार वृद्धितर्फ लागेको बजारमा त्यसपछिका तीन कारोबार लगातार घटेको छ। निरन्तर उतारचढावमा रहेको बजारमा सामान्य वृद्धितर्फ नजाँदै पुन: ओरालोतिर लागेको हो।
गएको सातभर नै निरन्तर उतारचढावमा देखिएर अन्तिम दुई कारोबार वृद्धितर्फ लागेको सेयर बजारमा यो साता आइतबारको वृद्धिले सुखद सुरुवात देखिए पनि सोमबार, मंगलबार र बुधबार बजार राताम्य बन्यो।
यो साता आइतबार १४.८१ अंकले बढेर सोमबार ३.६१ अंकले घटेको सेयर बजारमा मंगलबार पुन: ३१.८० अंकले घटेर २०४५.४४ बिन्दुमा झरेको थियो।
बुधबार २०.३१ अंकले घटेर बजार २०२५.१२ बिन्दुमा झरेको छ। ३४ कम्पनीको मात्र सेयर मूल्य बढेको बजारमा १ अर्ब ६७ करोड ९९ लाख रूपैयाँको कारोबार भएको छ। १८५ कम्पनीको सेयर मूल्य घटेको बजारमा ६ कम्पनीको मूल्यमा परिवर्तन भएको छैन।
बजारको अहिलेको उतारचढावपूर्ण अवस्थामा लगानीकर्ताहरू अझै पर्ख र हेरको अवस्थामा नै छन्। बजारमा लगानीकर्ताले स्थायी सुधारको आधार नभटेकाले निरन्तर वृद्धितर्फ जान नसकेको विश्लेषकहरू बताउँछन्।
