काठमाडौं- आइतबार १४.८१ अंकले बढेर सोमबार ३.६१ अंकले घटेको सेयर बजारमा मंगलबार पुन: दोहोरो अंकको गिरावट देखिएको छ। निरन्तर उतारचढावमा रहेको बजारमा सामान्य वृद्धितर्फ नजाँदै पुन: ओरालोतिर लागेको हो।
गएको सातभर नै निरन्तर उतारचढावमा देखिएर अन्तिम दुई कारोबार वृद्धितर्फ लागेको सेयर बजारमा यो साता आइतबारको वृद्धिले सुखद सुरुवात देखिए पनि सोमबार र मंगलबार बजार राताम्य बन्यो।
मंगलबार ३१.८० अंकले घटेर बजार २०४५.४४ बिन्दुमा झरेको छ। २० कम्पनीको मात्र सेयर मूल्य बढेको बजारमा २ अर्ब १५ करोड ७३ लाख रूपैयाँको कारोबार भएको छ। २०१ कम्पनीको सेयर मूल्य घटेको बजारमा ४ कम्पनीको मूल्यमा भने परिवर्तन भएको छैन।
बजारको अहिलेको उतारचढावपूर्ण अवस्थामा लगानीकर्ताहरू अझै पर्ख र हेरको अवस्थामा नै छन्। बजारमा लगानीकर्ताले स्थायी सुधारको आधार नभटेकाले निरन्तर वृद्धितर्फ जान नसकेको विश्लेषकहरू बताउँछन्। केही कारोबार निरन्तर घट्ने र एक दिन उचाइतर्फ लाग्ने गर्दै बजार उतारचढावको अवस्थामा नै रहिरहेको देखिन्छ।
