काठमाडौं- नेपाल नागरिक उड्डयन प्राधिकरणले बक्याैता नतिरेकाे भन्दै उडानमै राेक लगाएपछि सिम्रिक एयरले शुक्रबार नै ४३ लाख तिरेकाे छ। बक्यौता रकम तिरेसँगै शनिबारदेखि सिम्रिकका हेलिकप्टरले उडान गर्न पाउने भएका छन्।

क्याप्टेन रामेश्वर थापाकाे लगानी रहेकाे सिम्रकले शुक्रबार नै बक्याैता ४३ लाख तिरसँगै शनिबारदेखि उडान हुने भएकाे प्राधिकरणले जनाएको छ। बक्याैता नतिरेर उडानमा राेक लागेपछि सिम्रिकले विज्ञप्ति निकाल्दै विराेध जनाए पनि शुक्रबार नै क्यान पुगेर बक्याैता तिरेकाे हाे।

प्राधिकरणले सिम्रिक एयरका सबै हेलिकप्टर ग्राउन्डेड गरेको छ। बक्यौता तिर्न पटकपटक ताकेता गर्दा पनि अटेर गरेपछि प्राधिकरणले बिहीबारदेखि नै सबै हेलिकप्टर उडानमा प्रतिबन्ध लगाएको थियो।

प्राधिकरणले बक्यौता नतिरेसम्म कुनै पनि उडान हुन नदिनेगरी उडानमा रोक लगाएको थियो। क्याप्टेन रामेश्वर थापाको लगानी रहेको सिम्रक एयरले पटकपटक नियम उल्लंघन गरेको अरोपसमेत प्राधिकरणको थियो। हाल सिम्रिकले ४ वटा हेलिकप्टरमार्फत उडान गर्दै आएको छ। 

सिम्रिकसँग अहिले २ वटा बेल र २ वटा एएस ३५० हेलिकप्टर रहेका छन्। अब कम्पनीले प्राधिकरणलाई तिर्न बाँकी ४६ लाख रुपैयाँ बक्यौता चुक्ता गरी आफ्नो वित्तीय अवस्थाबारे आस्वस्त पार्न सके मात्र उडानबारे पुनःर्विचार हुन सक्ने प्राधिकणले बताएको थियो।

त्रिभुवन अन्तर्राष्ट्रिय विमानस्थलमा मात्र २७ लाख ९३ हजार रुपैयाँ बक्यौता रहेको थियो। लुक्लामा १५ लाख ७२ हजार ९६५ रुपैयाँ, ताप्लेजुङ विमानस्थलमा ४ लाख ३७ हजार र सिमिकोट विमानस्थलमा १ लाख ५८ हजार बक्यौता रहेको देखिएको थियो।