काठमाडौं- सञ्चार तथा सूचना प्रविधिमन्त्री रेखा शर्माले संघीय निजामती ऐनमा आईटी समूह राख्नका लागि प्रयास भइरहेको बताएकी छन्। सर्वांगिण विकास अध्ययन संस्था (आईआईडीएस) ले सूचना प्रविधिको विकास र विस्तारका बारेमा काठमाडौंमा आयोजना गरेको कार्यक्रममा बोल्दै मन्त्री शर्माले ऐनमै आईटी समूह राख्नका लागि काम भइरहेको बताएकी हुन्।
सूचना प्रविधिको विकासका लागि सरकारले हरसम्भव प्रयास गरिरहेको उनले बताइन्। सरकारी सेवालाई चुस्त दुरुस्त राख्नका लागि दक्ष जनशक्ति आवश्यक भएको तर अहिलेको सेवा सुविधा र संरचनामा त्यस्ता जनशक्ति आउन नमान्ने उनको भनाइ छ।
‘सामान्य निजामती सेवा र सुविधा संरचनामा सफ्टवेयर इन्जिनयर आउन मान्दैनन्', मन्त्री शर्माले भनिन्, 'त्यसैले हामीले छुट्टै समूह बनाउन खोजिरहेका छौँ।’
सरकारी सेवालाई नै आधुनिक बनाउने बाहेक सरकारले नयाँ कार्यक्रममार्फत पूर्वाधार निर्माण तथा सेवाको गुणस्तर बढाउन काम गरिरहेको उनले बताइन्।