काठमाडौं- चालु वर्षको पहिलो तीन महिनामा सरकारले दातृ निकायबाट एक रुपैयाँ पनि नगद विदेशी अनुदान पाएको छैन।
सरकारी लेखाको विवरण राख्ने महालेखा नियन्त्रकको कार्यालयको तथ्यांक अनुसार यो अवधिमा एक रुपैयाँ पनि विदेशी अनुदान भित्रिएको छैन।
सरकारले यो आर्थिक वर्षमा ५९ अर्ब ९१ करोड विदेशी अनुदान ल्याउने लक्ष्य लिएको छ। कात्तिक २३ गतेसम्म सरकारी खातामा एक रुपैयाँ पनि अनुदान आएको छैन।
यो अवधिमा सरकारले ३ खर्ब ८० अर्ब राजस्व आम्दानी गरेको छ। यसमा २७ अर्ब गैरकर छ भने बाँकी कर राजस्व संकलन गरेको छ।
गत वर्ष सरकारले यही अवधिमा ५ अर्ब अनुदान पाएको थियो।
माओवादीबाट अर्थमन्त्री हुँदा विदेशी दातृ निकाय सशंकित हुने अनुमान गरिन्छ। यद्यपि सरकारको नेतृत्व काँग्रेस नेतृत्वमा रहेकाले त्यसको प्रभाव दातृ निकायको मनोविज्ञानमा नपर्ने अधिकारीहरूको विश्वास छ।
दातृ निकायले दिने भन्दा पनि यसअघि नै प्रतिबद्धता भएको अनुदान खर्च गर्न नसक्दा पनि सरकारी खातामा नदेखिएको महालेखाका अधिकारीहरूको भनाइ छ।
