काठमाडौं- वित्तीय प्रणालीमा निक्षेप ५६ खर्ब ८ अर्ब पुगेको छ। आइतबारसम्म ५५ खर्ब ९९ अर्ब रहेको निक्षेप एकैदिन ९ अर्ब बढेको हो। योसँगै चैत मसान्तयता नै निक्षेप १ खर्ब २३ अर्ब थपिएको छ। चैत मसान्तसम्ममा ४८ खर्ब ८६ अर्ब रुपैयाँ रहेको कर्जा लगानी सोमबारसम्म घटेर ४८ खर्ब ६२ अर्बमा आइपुगेको छ। ऋण २४ अर्ब घटेको छ।
चालु आर्थिक वर्षको सुरुवातदेखि नै सुस्त रहेको बैंकहरुको कर्जा लगानी चौथो त्रैमासमा झनै घट्ने देखिएको छ। चौथो त्रैमासमा तरलता बढ्दै गएपनि कर्जा लगानी भने बढ्न सकेको छैन।
चैत मसान्तसम्ममा ४८ खर्ब ३२ अर्ब रुपैयाँ रहेको बाणिज्य बैंकहरुको निक्षेप संकलन यस अवधिमा बढेर ४९ खर्ब ५१ अर्ब पुगेको छ। तर ४३ खर्ब ३० अर्ब रहेको कर्जा लगानी घटेर ४३ खर्ब ४ अर्ब रुपैयाँमा झरेको नेपाल राष्ट्र बैंकको तथ्यांकमा देखिन्छ।
राष्ट्र बैंकले चालु आर्थिक वर्षमा १२.६ प्रतिशत कर्जा विस्तार गर्ने लक्ष्य लिएको भएपनि हालसम्म लक्ष्यको ३ प्रतिशत पनि कर्जा लगानी हुन सकेको छैन। गत आर्थिक वर्षको अन्तिमसम्ममा ४१ खर्ब ७५ अर्ब रुपैयाँ कर्जा लगानी गरेका बैंकहरुले ४३ खर्ब ४ अर्ब रुपैयाँ कर्जा लगानी गरेका छन्।
राष्ट्र बैंकको लक्ष्यअनुसार चालु आर्थिक वर्षमा ५ खर्ब ६० अर्ब रुपैयाँ कर्जा विस्तार हुनु पर्ने भए पनि हालसम्म १ खर्ब २९ अर्ब रुपैयाँ कर्जा लगानी भएको अवस्था छ। गत आर्थिक वर्षको असार मशान्तसम्ममा बैंकहरुले ४५ खर्ब ४५ अर्ब रुपैयाँ निक्षेप संकलन गरेका थिए। हालसम्म वाणिज्य बैंकहरुको निक्षेप संकलन ४९ खर्ब ५१ अर्ब पुगेको छ। यसअनुसार चालु आर्थिक वर्षमा बैंकहरुको निक्षेप संकलन ४ खर्ब ९ अर्ब अर्ब रुपैयाँले बढेको छ।
वित्तिय संस्थाको निक्षेप–कर्जा (सीडी) रेसियो ८३.५५ प्रतिशतमा झरेको छ। अहिलेको निक्षेप अनुसार वित्तिय संस्थाहरुले ३ खर्ब ६० अर्ब लगानी गर्न सक्ने अवस्थामा रहेका छन्। चालु आर्थिक वर्षको सुरुवातमा तरलता अभावले ९० प्रतिशत हाराहारी रहेको बैंकहरुको सीडी रेसीयो अहिले घट्दो क्रममा छ। यसैगरी घट्दै गएमा असार मसान्तसम्म ८० प्रतिशतमा आउन सक्ने देखिएको छ।
बैंकहरु असुलीमा केन्द्रित भएको कारण अहिले कर्जा लगानी उल्टो घट्दो क्रममा रहेको छ। मौद्रिक नीतिको तेस्रो त्रैमासिक समीक्षाबाट असार मसान्तसम्म मात्रै ऋणपत्रलाई सीडीमा गणना गर्न पाउने व्यवस्था रहेको ऋणपत्रलाई पुस मसान्तसम्म गणना गर्न पाउने व्यवस्था गरिदिएको छ। यतास्थानीय तहको ८० प्रतिशत रकम आगामी पुस मसान्तसम्म निक्षेपमा गणना गर्न पाइने भएको छ।
