काठमाडौं-कोरोना कालमै नेपाल भ्रमणमा आउने पर्यटकको संख्या झण्डै ६७ हजार पुगेको छ। सन् २०२१ को जनवरीदेखि अगष्टसम्ममा नेपाल भ्रमणमा आउने पर्यटकको संख्या ६६ हजार ९ सय ६६ रहेको अध्यागमन विभागले जनाएको छ।
अध्यागमन विभागमा अनुसार पछिल्लो अगष्ट महिनामा नेपाल भ्रमणमा आउने पर्यटकको संख्यामा झिनो सुधार आएको छ। पछिल्लो ३ महिना मे, जुन र जुलाईमा नेपाल भ्रमणमा आउने पर्यटकको संख्या ह्वातै घटेका थियो। मे महिनादेखि नेपालमा लकडाउन भएको थियो।
लकडाउनसँगै अन्तर्राष्ट्रिय उडान बन्द भएको थियो। जसका कारण पर्यटन आउने बाटो बन्द थियो। विस्तारै अन्तर्राष्ट्रिय उडान खुल्न थालेसँगै पर्यटकको संख्या बढेको हो।
विभागमा अनुसार अगष्ट महिनामा नेपाल भ्रमणमा आउने पर्यटकको संख्या ५ हजार ९ सय १७ रहेको छ। तर, मे महिनामा नेपाल भ्रमणमा आउने पर्यटकको संख्या १ हजार ४ सय ६८ थियो भने जुनमा उक्त संख्या पनि घटेर १ हजार १ सय ४३मा झरेको थियो। यसैगरी, जुलाई महिनामा भने मे र जुन महिनाको तुलनामा उक्त संख्या बढेर २ हजार ९ सय ९१ पुगेको थियो।
कुन महिना कति पर्यटक नेपाल आए
विभागमा अनुसार सन् २०२१ को ८ महिनामा कुल ६६ हजार ९ सय ६६ पर्यटन नेपाल भ्रमणमा आएका छन्। जसमा सबैभन्दा बढी अप्रिलमा २२ हजार ४ सय ५० जना पर्यटन नेपाल भ्रमण आएका छन्।
यसैगरी मार्चमा १४ हजार ९ सय ७७, फेब्रुअरीमा ९ हजार १ सय ४६ जना र जनवरीमा ८ हजार ८ सय ७४ जना पर्यटक नेपाल भ्रमणमा आएका थिए।
