काठमाडौं- भारत विश्वकै सर्वाधिक जनसंख्या भएको देश बनेको छ। संयुक्त राष्ट्रसंघले बुधबार सार्वजनिक गरेको तथ्यांकअनुसार चीनलाई उछिन्दै भारत विश्वकै धेरै जनसंख्या भएको देश बनेको हो। 

राष्ट्रसंघको तथ्यांकअनुसार भारतको जनसंख्या १ अर्ब ४२ करोड ८० लाख नाघेको छ। यो संख्या चीनमा रहेको १ अर्ब ४२ करोड ५० लाखभन्दा केही बढी हो। 

भारतमा रहेको कुल जनसंख्याको करिब आधा हिस्सा ३० वर्षभन्दा कम उमेरका युवाले ओगटेको छ। यही जनसंख्या भारतको आर्थतन्त्रको वृद्धिका लागि महत्वपूर्ण सावित हुनेछ। 

भारत अहिले एसियाको तेस्रो ठूलो अर्थतन्त्र भएको देश हो भने विश्वको पाँचौं ठूलो अर्थतन्त्र भएको देश हो।

२०५० सम्म पुग्दा भारतको जनसंख्या १ अर्ब ६६ करोड ६० लाख हुने अनुमान गरिएको छ भने चीनको जनसंख्या १ अर्ब ३१ करोड ७० लाखमा सीमित हुने अनुमान गरिएको टाइम्स अफ इन्डियाले लेखेको छ।