काठमाडौं- चितवनको भरतपुर विमानस्थल सञ्चालनको ६५ वर्षपछि सुविधासम्पन्न आधनुनिक टर्मिनल भवन निर्माण हुने भएको छ। टर्मिनल भवनको बिहीबार प्रधानमन्त्री पुष्पकमल दाहाल 'प्रचण्ड' ले शिलान्यास गरेका छन्।

भवनको शिलान्यास गर्दै प्रचण्डले विमानस्थलको विकास र स्तराेन्नतिका काम सुरू भएको बताए। भरतपुर विमास्थल विस्तारमा लामो सयमदेखि लविङ गर्दै आएका प्रधानमन्त्री दाहालले केही समयमै विमानस्थलको रनवे विस्तारको काम पनि सुरू हुने बताए।

विमानस्थलमा अहिले प्रयोगमा रहेको टर्मिनल भवन २२ वर्ष अगाडि बनेको हो। नेपाल नागरिक उड्डयन प्राधिकरणले टर्मिलन भवन पुरानो भइसकेको र यात्रुको चापु थेग्न नसक्ने भएपछि नयाँ टर्मिलन भवन निर्माण गर्न लागिएको हो। 

टर्मिनल भवन निर्माणका लागि प्राधिकरणले सोमबार मात्रै निर्माण कम्पनीसँग सम्झौता गरेको थियो। प्राधिकरणले करबाहेक एक अर्ब ९२ करोड रुपैयाँमा भवन निर्माणका लागि सम्झौता गरेको हो।

निर्माण कम्पनीले ३ वर्षभित्र भवन निर्माण गरिसक्नु पर्ने गरी सम्झौता भएको छ। 

निर्माणको जिम्मा केसी क्षमा देवी प्रतिष्ठा जेवीले पाएको छ। विमानस्थलमा सिवानी एयरको ह्याङगर रहेको ठाउँमा टर्मिनल भवन निर्माण हुनेछ। ४ हजार ८ सय स्क्वायर मिटर क्षेत्रफलमा २ तले भवन निर्माण हुनेछ। टर्मिनल भवनको कुल स्पेस भने ८ हजार स्क्वायर वर्ग मिटरभन्दा बढी हुनेछ।