काठमाडौं- नेपाल धितोपत्र बोर्डका अध्यक्ष रमेशकुमार हमालले बुक बिल्डिङ प्रक्रिया दुई महिनाभित्र टुंगो लाग्ने बताएका छन्।
गत हप्ता मात्र नेप्से, मर्चेन्ट बैक लगायतसँग गहन अध्ययन गरी एउटा समिति बनाइएकाे उनले जानकारी दिए। लगानीकर्ताको सेयर भ्यालुलाई मूल्यांकन गरी निर्णय लिन निर्देशन दिएको उनले बताए।
उनले ब्रोकर कमिसन घटाउने तयारीमा रहेको समेत बताए। लगानीकर्ताहरुको संगठनहरुले गरेको 'समृद्ध नेपालको आधार पुँजीबजार सुधार' कार्यक्रममा दिनेक्रममा यस्तो बताएका हुन्।
‘मैले पहिलेदेखि नै ब्रोकर कमिसन घटाउन पहल गर्छु भनेको थिएँ। आज पनि त्यसमा लागिरहेको छु', उनले भने, 'अहिले बजार करेक्सन भएकाले पर्खिएको हुँ। बजार थोरै मुभ भएसँगै यो अघि बढ्छ।’
ब्रोकर कमिसन मात्र नभइ सिडिएसी, धितोपत्र कमिसन घटाउन पनि तयार रहनुपर्ने भन्दै यसमा होमवर्क गरेको उनले बताए।
