काठमाडौं- मलेसियामा नियमित उडान छाडेर चार्टर्ड उडान गर्ने तयारी गरेपछि नेपाल नागरिक उड्डयन प्राधिकरणले नेपाल वायुसेवा निगमलाई स्पाष्टीकरण सोधेको छ।
निगम नेतृत्वले कमिसन खान र यात्रुसँग बढी रकम असुल्ने गरी नियमित उडान छाडेर चार्टर्ड उडानको अनुमति माग गरेको थियो। सोही विषयमा प्राधिकरणले निगम नेतृत्वलाई स्पाष्टीकरण सोधेको हो।
निगमले हाल दैनिक रुपमा मलेसिया उडान गर्दै आएको छ। वैदेशिक रोजगारीमा जानेहरू बढिरहेका बेला यात्रुसँग भाडा बढी असुल्ने नियतले निगमले चार्टर्ड उडान गर्न खोजेको बुझिएको छ।
निगमले अहिले पनि यात्रुसँग मलेसिया एकतर्फी उडानको ३५ हजार रुपैयाँ भाडा लिँदै आएको छ। चार्टर्ड उडान गर्न पाएमा दोबर असुल्ने गरी निगमले प्रक्रिया अगाडि बढाएपछि प्राधिकरणले स्पष्टीकरण मागेको हो।
हाल नेपालबाट सबैभन्दा बढी कामदार मलेसियामा नै वैदेशिक रोजगारीमा जाने गरेका छन्। वैदेशिक रोजगार विभागका अनुसार, गत माघमा ६४ हजार २ सय ८४ जना नेपालीले वैदेशिक रोजगारीमा जानका लागि श्रम स्वीकृति लिएका छन्। जसमा ५८ हजार ४ सय ४७ पुरुष र ५ हजार ८ सय ३७ जना महिला रहेका छन्। यो सङ्ख्या पहिलोपटक वैदेशिक रोजगारीमा जान व्यक्तिगत श्रम स्वीकृति लिने, संस्थागत नयाँ श्रम स्वीकृति लिने र पुनः श्रम स्वीकृति लिनेको हो।
यसैगरी नयाँ श्रम स्वीकृति लिने नेपालीको सङ्ख्या ३९ हजार १ सय २४ जना रहेको छ। जसमा ४ हजार २ सय ६६ जना महिला र ३४ हजार ८ सय ५८ जना पुरुष रहेको विभागले जनाएको छ। जसमा सबैभन्दा धेरै मलेसिया जानका लागि श्रम स्वीकृति लिनेको सङ्ख्या १९ हजार ७ सय ८३ जना रहेको छ।
नेपाल र मलेसिया सरकारबीच भएको हवाई सेवा सम्झौता बमोजिम प्रति हप्ता १४ वटा नियमित उडान संचालन गर्न पाउने व्यवस्था भएतापनि सो वृतखण्डमा नियमित उडान संचालन नगरी यात्रु चार्टर उडान संचालनको लागि अनुमति माग गरिएको विषयमा प्राधिकरणद्वारा नेपाल वायुसेवा निगमलाई स्पष्टीकरण सोधिएको छ।
— Civil Aviation Authority of Nepal (@hello_CAANepal) March 27, 2023
