काठमाडौं- डीडीसी दूधको मूल्य प्रतिलिटर ११ रूपैयाँले बढेको छ।
सरकारले दूधको किसान मूल्य बढाएसँगै सरकारी स्वामित्वको दुग्ध विकास संस्थान (डीडीसी) ले बिहीबारदेखि लागु हुनेगरी दूधको उपभोक्ता मूल्य प्रतिलिटर ११ रूपैयाँले बढाउने निर्णय गरेको हो।
मूल्यवृद्धि भएसँगै यसअघि प्रतिलिटर ८६ रूपैयाँ पर्ने डीडीसी दूध अब प्रतिलिटर ९७ पुगेको छ। यसअघि प्रतिप्याकेट ४३ रूपैयाँमा बिक्री गर्दै आएको डीडीसी प्याकेट दूधको मूल्य अब प्रतिप्याकेट ४८ रुपैयाँ ५० पैसा पुगेको छ।
कुन क्षेत्रमा कति छ मूल्य?
काठमाडौं, विराटनगर, हेटौँडा, जनकपुर क्षेत्रमा प्रतिलिटर ९७ रूपैयाँ मूल्य कायम गरिएको छ।
यस्तै बुटवल क्षेत्रमा प्रतिलिट ९४, नेपालगञ्ज र धनगढीमा प्रतिलिटर ९२ रूपैयाँ कायम गरिएको डीडीसीले जनाएको छ।
गएको फागुन १७ गते बसेको मन्त्रिपरिषद्को बैठकले दूधको किसान मूल्य प्रतिलिटर ९ रूपैयाँले बढाउने निर्णय गरेको थियो। ३ प्रतिशत फ्याट ८ एसएनएफयुक्त दूधको किसान मूल्य ५६ रुपैयाँबाट बढाएर सरकारले ६५ रुपैयाँ पुर्याएको हो।
