काठमाडौं- विशेष अदालतले भृकुटीमण्डपस्थित समाज कल्याण परिषद्को जग्गा भाडामा दिँदा भएको भ्रष्टाचार मुद्दामा निलम्बित नेपाली कांग्रेसका सांसद टेकबहादुर गुरुङलाई २ करोड ४५ लाख बराबर बिगो र जरिवाना गर्ने फैसला सुनाएको छ।

यसैगरी पूर्वमन्त्री बद्रिप्रसाद न्यौपानेलाई भने मुख्य दोषी ठहर गरेको छ। मुख्य दोषी ठहर भएका न्यौपानेलाई ९ वर्ष ६ महिना कैद र बिगो तथा जरिवाना गरी ४ करोड ८७ लाख बराबर असुलउपर गर्ने फैसला भएको छ। श्रीकान्त पौडेलसहितको इजलासले यस्तो सजाय ठहर गरेको हो। 

भृकुटीमण्डपस्थित फनपार्क भाडामा दिँदा अनियमिता गरेको आरोपमा अख्तियारले गुरुङसहित नेकपा एमालेका नेता एवं पूर्वमन्त्री बद्रीप्रसाद न्यौपानेसमेत १४ जनालाई विपक्षी बनाएको थियो। अख्तियारले विपक्षी बनाइएकाहरुविरुद्ध ३१ करोड ५२ लाख १७ हजार ६ हजार ७८ रुपैयाँ बिगो र कैद मागदाबी गरिएको थियो। 

विशेषले पाँच जनालाई सफाइ दिँदै नौ जनालाई दोषी ठहर गरेको थियो।

७ जनालाई कैद र जरिवाना तथा दुईजनालाई जरिवानामात्र सजाय सुनाइएको छ। कैद सजाय नभएका रविन्द्र गुरुङलाई २ करोड ४३ लाख ६८ हजार ८ सय ३ रुपैयाँ ५० पैसा जरिवाना र सो बराबरको बिगो भराउने फैसला भएको विषेश अदालतले जनाएको छ।