काठमाडौं- अन्नपूर्ण केबलकारले बिहानीको समयमा केबलकारमा यात्रा गर्दा ५० प्रतिशतसम्म छुट दिने भएको छ।
यसअघि कायम गरिएको दररेटमा साेमबारदेखि ५० प्रतिशतसम्म छुट प्रदान गरिएको अन्नपूर्ण केबलकारका प्रशासन प्रमुख दामोदर तिमिल्सिनाले जानकारी दिए।
बिहान ५ देखि ७:३० सम्म सराङकोटबाट सूर्योदय अवलोकनका लागि जान चाहने पर्यटकले दुईतर्फी भाडा ४ सयमात्रै तिरे पुग्ने कम्पनीले जनाएको छ। यसअघि सो समयमा ७ सय रुपैयाँ भाडा रहेको थियो।
कम्पनीका अनुसार अपाङ्गता भएका व्यक्तिलाई लक्षित गर्दै दुईतर्फी भाडामा ३५० मात्रै कायम गरिएको छ। त्यस्तै विद्यार्थी र बालबालिकालाई पनि थप छुट प्रदान गरिएको छ। विद्यार्थी र बालबालिकाका लागि बिहान ५ बजेदेखि साढे ७ बजेसम्म दुईतर्फी ४ सय र एकतर्फी यात्राका लागि २ सय रुपैयाँ शुल्क तय गरिएको छ।
साढे ७ देखि ८ बजेसम्मको समय ‘ब्रेक’ राखिएको छ भने बिहान ८ बजेदेखि साढे १ बजेसम्मका लागि भने पहिलेकै भाडादर कायम छ। यो समयमा यात्रा गर्ने अपाङ्गता, बालबालिका र विद्यार्थीबाहेकलाई दुईतर्फी भाडा ७ सयमात्रै कायम गरिएको छ।
कम्पनीले साँझको समयमा पनि छुटको व्यवस्था गरेको जनाएको छ। बिहानी सेवाजस्तै दिउँसो २ बजेदेखि ६ बजेसम्म यो सेवा प्रदान गर्न लागिएको अन्नपूर्ण केबलकारले जनाएको छ।
पर्यटकीय नगरी पोखराको सेदीबगरदेखि सराङकोटसम्म केबलकारमा यात्रा गर्न सकिन्छ।