काठमाडौं- आर्थिक वर्ष २०८०/८१ सम्मको नाफाबाट हालसम्म जलविद्युत समूहतर्फका ९ कम्पनीले लाभांश घोषणा गरेका छन्।  नेपाल स्टक एक्सचेन्ज (नेप्से)मा सूचीकृत ९१  जलविद्युत् कम्पनीमध्ये  ९ कम्पनीले लाभांश घोषणा गरेका हुन। 

अपी पावर, माण्डु हाइड्रोपावर, अरुण भ्याली हाइड्रोपावर, भगवती हाइड्रोपावर, सुपर मादी हाइड्रोपावर, मन्दाकिनी हाइड्रोपावर, सुपर माई हाइड्रोपावर, साहस उर्जा र रुरु जलविद्युत परियोजनाले गत आवको नाफाबाट लाभांश वितरण गर्ने घोषणा गरेका छन्। 

जसमध्ये साहस उर्जा, भगवती हाइड्रोपावर, सुपर मादी हाइड्रोपावर र माण्डु हाइड्रोपावरको प्रस्तावित लाभांश साधारण सभाबाट पारित भइसकेको छ । साहस उर्जाले  ८ प्रतिशत बोनस सेयर र कर प्रयोजनको लागि ०.४२१ प्रतिशत नगद लाभांश पारित गरिसकेको छ।

भगवती हाइड्रोपावरले असोज १६ गते सम्पन्न वार्षिक साधारण सभाले ४ प्रतिशत बोनस सेयर र १०. ७३६८ प्रतिशत नगद लाभांश पारित गरेको हो। त्यसैगरी, माण्डु हाइड्रोपावरले १२ प्रतिशत नगद लाभांश असोज १४ गते सम्पन्न वार्षिक साधारण सभाले पारित गरेको हो। 

सुपर मादी हाइड्रोपावरले गत आवको नाफाबाट ५ प्रतिशत बोनस सेयर र कर प्रयोजनको लागि ०.२६ प्रतिशत नगद लाभांश प्रस्ताव गरेको छ। यो प्रस्ताव कम्पनीको वार्षिक साधारण सभाले पारित गरेको छ। 

रुरु जलविद्युत परियोजनाले गत आवको सेनाफाबाट शेयरधनीलाई १५ प्रतिशत बोनस सेयर र कर प्रयोजनको लागि ०.७८९ प्रतिशत नगद लाभांश प्रस्ताव गरेको छ।  कम्पनीको बुक क्लोज भइसकेको छ ।

त्यस्तै, अरुण भ्याली हाइड्रोपावरले गत आवको नाफाबाट सेयरधनीलाई ३ प्रतिशत बोनस सेयर र कर प्रयोजनको लागि ०.१५७ प्रतिशत नगद लाभांश वितरण गर्ने प्रस्ताव गरेको हो। यस कम्पनीको बुक क्लोज भइसकेको छ। 

मन्दाकिनी हाइड्रोपावरले गत आवको नाफाबाट सेयरधनीलाई ५ प्रतिशत बोनस सेयर र कर प्रयोजनको लागि ०. २६३२ प्रतिशत नगद लाभांश वितरण गर्ने प्रस्ताव गरेको छ। 

त्यस्तै अपि पावर कम्पनीले गत आवको नाफाबाट सेयरधनीलाई ५ प्रतिशत बोनस सेयर र कर प्रयोजनको लागि ०.२६३२ प्रतिशत नगद लाभांश वितरण गर्ने प्रस्ताव पारित गरेको छ। यस कम्पनीको बुक क्लोज भएको छ। 

सुपर माई हाइड्रोपावरले गत आवको नाफाबाट सेयरधनीलाई ७ प्रतिशत बोनस सेयर र करसहित ५.६३ प्रतिशत नगद लाभांश वितरण गर्ने प्रस्ताव गरेको छ।