काठमाडौं- प्रहरीको केन्द्रीय अनुसन्धान ब्यूरो (सीआईबी) ले ठगी मुद्दामा पक्राउ परेका व्यवसायी पृथ्वीबहादुर शाह र उनको समूहमा रहेका व्यक्तिविरुद्ध चारवटा मुद्दा चलाउन सुझाव दिएको छ। 

बुधबार सीआईबीले पत्रकार सम्मेलन गरी सीआईबीले शाहसहित उनका सहयोगीविरुद्ध ठगी, संगठित अपराध, सहकारी ठगी र लिखतसम्बन्धी कसूर गरी चारवटा मुद्दा दायर गर्न सरकारी वकिल कार्यालयलाई सुझाव दिएको हो।

शाहले ५६ जनालाई ठगेको सीआईबीको निष्कर्ष छ। ठग्नकै लागि २४ वटा कम्पनी खडा गरेको अनुसन्धानमा खुलेको छ। ठगी र संगठित अपराधमा शाहसहित २० जना संलग्न रहेको सीआईबीले जनाएको छ। 

रिमोट एक्सेसबाट पीडितहरुको डिभाइस मार्फत बैंक एकाउण्टमा पहुँच पुर्‍याउने र मौज्दात रकम नेपाल र थाइल्याण्डमा पठाउने गरेको, पीडितको खाताबाट विभिन्न बैंकहरु हुँदै रकम ट्रान्सफर भएर आउँदा आवश्यकता बमोजिम बैंकहरुलाई खातावाला (पीडित) का तर्फबाट आफैलाई इमेल पठाउने गरेको पनि खुलेको छ।

क्यान्सर, अल्जाइमर रोगबाट पीडित र जेष्ठ नागरिकहरुलाई टार्गेट गरी ठगी गर्ने र पीडितहरुलाई मनि लाउण्डरिङले कारबाही गर्छ र कानूनी उल्झनमा परिन्छ भन्दै पीडितहरुलाई कानूनी प्रक्रियामा नजान धम्की दिने, पीडितलाई फोन गरेर उनीहरुमाथि निगरानी गर्ने गरेको पनि अनुसन्धानमा खुलेको छ।  

अमेरिकामा अनलाइनमार्फत ठगी गरेको रकम नेपाल ल्याएको आरोपमा शाहलाई सीआईबीले पक्राउ गरेको थियो। ब्यूरोका अनुसार उनीहरुबाट अहिलेसम्म ५६ जना ठगिएको पाइएकोमा २४ वटा मात्रै उजुरी परेको थियाे। 

शाहको समूहले ठगी गरी नेपाल ल्याएको रकम ३८ करोड ८६ लाख ६२ हजार १३६ रुपैयाँ रहेको सीआईबीले बताएको छ। जसमध्ये १ करोड २८ लाख ९३ हजार ८५ रुपैयाँ बैंकहरुले रोक्का गरेका छन्।