काठमाडौं- लामो समयदेखि भन्सार नाकाहरुमा रहेका सवारीसाधनहरु छुटाउन तथा त्यसको सहज निकासका लागि आग्रह गरिएको छ।
नाडाका अध्यक्ष ध्रुव थापाको नेतृत्वमा बिहीबार भन्सार विभाग गएको प्रतिनिधिमण्डलले विभागका महानिर्देशक चक्रबहादुर बुढासँग भन्सार नाकामा रहेका सवारीसाधनहरु छुटाउन आग्रह गरेको हो।
उक्त छलफलमा नाडाका अध्यक्ष थापाले सरकारले सवारी साधनहरुको आयातमा लगाएको प्रतिबन्ध खुलाए पनि सो आयात प्रतिबन्ध लगाउनु अघिदेखि नै नेपाल राष्ट्र बैंकले लागु गरेको अटो लोन/हायर पर्चेज कर्जामा जोखिम भारलाई १५० प्रतिशतबाट पुरानै अवस्थामा नल्याएसम्म सवारी साधनहरुको खरिद-बिक्रीमा कुनै सुधार हुन नसकेको बताए। यसैकारण सवारी साधन पैठारीकर्ताहरुले भन्सार नाकाहरुबाट आफ्ना सवारीसाधनहरु उठाउन नसकेको उनले स्पष्ट पारे।
यस्तै नाडाका उपाध्यक्ष निराकार श्रेष्ठले कार, जीप र भ्यानजस्ता सवारीसाधनको बजार वार्षिक १७/१८ हजार रहेकामा अहिले त्यो घटेर ७/८ हजारमा झरेको बताए। उनका अनुसार कुल सवारीसाधनको बिक्री ८५ प्रतिशतसम्म बैंक ऋणबाटै हुने गरेको छ।
नाडाका सहकोषाध्यक्ष पंकज अग्रवालले एलसी खोलेर ल्याएका स्पेयर पार्टसहरुको मूल्यांकनमा पनि समस्या आइरहेकोले पैठारीकर्ताले पेश गरेको बिल मूल्यलाई मान्यता दिन आग्रह गरे। सन्दर्भ मूल्य सूचीले व्यवसायीहरुलाई धेरै समस्या परिरहेकोले सो सन्दर्भ मूल्य सूचीलाई खारेज गर्नुपर्ने उनले धारणा राखे।
छलफलमा विभागका महानिर्देशक बुढाले भन्सार नाकाहरुमा रहेका सवारी तथा ढुवानीका साधनहरुको सम्बन्धमा मन्त्रालयमा समेत पटक-पटक छलफल भइसकेको बताए। नेपालका भन्सार नाकाहरुबाट छुटाउन बाँकी रहेका सवारीसाधनहरु (दुई पांग्रे तथा तीन पांग्रेबाहेक) को विवरण यथाशीघ्र विभागमा पठाउन अनुरोध समेत गरे।
