काठमाडौं- चालु आर्थिक वर्षको सात महिनामा ९ खर्ब १९ अर्ब रुपैयाँको वस्तु आयात भएको छ। भन्सार विभागका अनुसार साउनदेखि माघसम्मको अविधमा विदेशबाट हुने आयात गत वर्षको यही अवधिको तुलनामा १९ प्रतिशतले घटेको छ। गत वर्षको यही अवधिमा ११ खर्ब ४७ अर्ब रुपैयाँको आयात भएको थियो। यो वर्ष गत वर्षको तुलनामा २ खर्ब २८ अर्ब रूपैयाँले आयात घटेको छ। 

गत वर्षको तुलनामा यो वर्ष निर्यात पनि २९ प्रतिशतले घटेको छ। गत वर्षको सात महिनामा १ खर्ब ३१ अर्बले निर्यात भएकोमा यो वर्ष घटेर ९३ अर्बमा सीमिति भएको छ। 

चालु वर्षको छ महिनासम्म आयातमा सीमा लागेको तथा बजारमा न्यून माग हुँदा आयात प्रभावित भएको थियो। मुलुकमा वैदेशिक मुद्राको सञ्चिति घट्दै गएपछि सरकारले गत वर्षको चैतदेखि आयातमा कडाइ गरेको थियो। यही पुसदेखि आयातलाई खुकुलो बनाइएको छ। 

भटमास लगायतका तेलको निर्यात घट्दा निर्यात प्रभावित भएको छ। 

सात महिनामा व्यापार घाटा ८ खर्ब २५ अर्ब रहेको छ। यो गत वर्षको तुलनामा १८ प्रतिशतले न्यून हो। समग्रमा सात महिनामा गत वर्षको तुलनामा २० प्रतिशतले अन्तर्राष्ट्रिय व्यापार घटेको छ।