काठमाडौं- चालु आर्थिक वर्षको छ महिनामा रेमिट्यान्स आप्रवाहमा सुधार भएको छ। पछिल्लो समय कामका लागि विदेश जाने नेपालीहरूको संख्यामा वृद्धि भएको तथा अमेरिकी डलर बलियो हुँदा नेपाल आउने रेमिट्यान्समा उच्च वृद्धि देखिएको छ। 

नेपाल राष्ट्र बैंकका अनुसार चालु आर्थिक वर्षको साउनदेखि पुससम्म मासिक ९० अर्ब माथि रेमिट्यान्स भित्रिएको छ। 

साउनमा ९२ अर्ब रेमिट्यान्स भित्रिएकोमा पुसमा १ खर्ब ४ अर्ब ६० करोड रुपैयाँ रेमिट्यान्स भित्रिएको छ। पछिल्ला छ महिनामा निरन्तर रेमिट्यान्स बढेको छ। 

भदौ र असोजमा ९४/९४ अर्ब भित्रिएको रेमिट्यान्स कात्तिकमा ९७ अर्ब र मंसिरमा १ खर्ब २ अर्ब रेमिट्यान्स भित्रिएको थियो। 

गत वर्षको तुलनामा २४ प्रतिशतले रेमिट्यान्स बढेको छ। छ महिनामा कूल ५ खर्ब ८५ अर्ब रेमिट्यान्स भित्रिएको छ। गत वर्षको छ महिनामा रेमिट्यान्स ५ प्रतिशतले घटेको थियो। डलरको भाउ बढेका कारणले मात्र नभइ विदेशी मुद्रामै पनि वृद्धि भएको छ। राष्ट्र बैंकका अनुसार अमेरिकी डलरमा १३.९ प्रतिशतले बढेको छ।