काठमाडौं- यातायात मजदूरले अनिश्चितकालका लागि भन्दै थालेको सार्वजनिक यातायात बन्द गर्ने सबै निर्णय स्थगित गरेका छन्।
भौतिक पूर्वाधार तथा यातायात मन्त्रालयमा सरकार, यातायात व्यवसायी तथा मजदूरबीच भएको वार्तामा सहमति भएको हो।
वार्तामा सहभागी काठमाडौं महानगरपालिका प्रतिनिधिले सार्वजनिक यातायात सुधारका लागि मन्त्रालयका सचिवको संयोजकत्वमा गठन भएको उच्चस्तरीय कार्यदलले छिटोभन्दो छिटो रिपोर्ट बुझाउने र सोहीअनुसार काम गर्ने सहमित भएको छ।
यातायात मजदूरहरूले विभिन्न १० बुँदे माग राखेर सोमबारदेखि आन्दोलन गरेका थिए। मंगलबार वार्तामा रहेका एक सहभागीका अनुसार यातायात मजदूरलाई कुटपिट गर्नेहरूमाथि कारबाही गर्ने, बाँकी मुद्दाहरूबारे मन्त्रालयले गठन गरेको सर्वपक्षीय कार्यदलमा छलफल गर्ने र सार्वजनिक यातायात बन्दको कार्यक्रम फिर्ता लिने सहमति भएको हो।
साथै आइतबारको आन्दोलनमा भएको लुटपाटमा सहभागी जो सुकैलाई कारबाही गर्ने विषयमासमेत सहमति भएको छ।
व्यवसायी तथा मजदूरले ल्होत्से सहकारीको विषयमा प्रश्न गरेपछि त्यसको विषयमा महानगरले अध्ययन गरेर रिपोर्ट बुझाउने सहमति समेत भएको छ।