काठमाडौं- चालु आर्थिक वर्षको सुरुदेखि नै लक्ष्य अनुसार राजस्व उठाउन असफल भएको सरकारले गत वर्षको तुलनामा न्यून राजस्व संकलन गरिरहेको छ।
साउनदेखि माघसम्म राजस्व १६ प्रतिशतले ऋणात्मक भएको छ। महालेखा नियन्त्रकको कार्यालयको तथ्यांक अनुसार सात महिनामा यो वर्ष सरकारले ५ खर्ब १४ अर्ब राजस्व संकलन गरेको छ। यो गत वर्षको तुलनामा १६ प्रतिशतले न्यून हो।
गत वर्षको यही अवधिमा सरकारले ६ खर्ब १३ अर्ब राजस्व संकलन गरेको थियो। पुससम्म राजस्व १५ प्रतिशतले ऋणात्मक थियो। राजस्व आम्दानी ऋणात्मक भएको तथा अन्य आम्दानी पनि गिरावट आएर संघीय सरकारको ढुकुटी १ खर्ब बढीले ऋणात्मक भएको छ।
सरकारी ढुकुकटी ऋणात्मक भएको तथा आगामी दिनमा पनि यसमा सुधार हुने सम्भावना नभएको भन्दै सरकारले आइतबार मात्र यो वर्षको बजेटको आकार २ खर्बले घटाएको थियो।