काठमाडौं- चालु आर्थिक वर्षको छ महिनामा विद्युतीय चुलोको आयात चार गुणाले बढेको छ।
भन्सार विभागका अनुसार साउनदेखि पुससम्म नेपालमा १ लाख ४२ हजार ८९० वटा विद्युतीय चुलोको आयात भएको छ।
यो वर्षको आयात गत वर्षको यही अवधिको तुलनामा चार गुणा बढी हो। गत वर्षको यही अवधिमा ३२ हजार ४५६ वटा विद्युतीय चुलो नेपाल भित्रिएका थिए।
बिजुलीबाट खाना पकाउन मिल्ने यस्ता चुलोको आयात पछिल्लो समय बढीरहेको छ। ग्यासको तुलनामा सस्तो हुने र बिजुलीको आपूर्ति पनि नियमित हुँदै गएपछि यस्ता चुलोतर्फ उपभोक्ता आकर्षित भइरहेका छन्।
नेपालमा विशेषगरि इन्डक्सन र इन्फ्रारेड चुलो आयात हुन्छ। यो वर्षको छ महिनामा ८४ हजार २६० वटा इन्डक्सन चुलो आयात भएको छ भने ५८ हजार ६३० वटा इन्फ्रारेड चुलो आयात भएको छ।
त्यस्तै यो वर्ष राइस कुकरको आयात पनि सामान्य वृद्धि भएको छ। यो वर्षको छ महिनामा १ लाख ६५ हजार वटा राइस कुकर आयात भएको छ।
बिजुलीबाट चल्ने भान्साका सामग्रीको आयातमा पछिल्लो समय सकारात्मक लय देखिएको छ। सरकारले विशेषगरि यस्ता सामग्रीको उपयोगमा प्रोत्साहन दिने नीति लिएको छ।
