काठमाडौं- नेपाल टेलिकमको सेयर मूल्य मंगलबार झनै उचालिएको छ। मंगलबार प्रतिकित्ता ३० रुपैयाँले बढेर ८८९ रुपैयाँमा कारोबार भएको छ। 

नेपाल टेलिकमले नाफाबाट सेयर धनीलाई वितरण गर्ने लाभांश पारित गरेर लगानीकर्ताको खातामा पठाइसकेको छ। कम्पनीले प्रतिसेयर ४० रुपैयाँ नगद लाभांश दिएको थियो।

यसको अर्थ एकसय कित्ता सेयर हुनेले ४ हजार नगद लाभांश पाएका छन्। मूल्य समायोजन भएर ८०० रुपैयाँमा आएपछि पुनः लगानीकर्ताले टेलिकमको सेयर खरिद गर्न थालेपछि मूल्य बढेको हो। 

गत वर्ष नगद २० प्रतिशत र बोनस सेयर २० प्रतिशत दिएको थियो। यो वर्ष भने कम्पनीले ४० प्रतिशत नगद लाभांश दिएको छ। 

कम्पनीले मंगलबार सबैभन्दा धेरै कारोबार हुने सूचीमा परेको छ। कम्पनीको १ लाख ४९ हजार कित्ता सेयर किनबेच हुँदा १२ करोड ९१ लाख रुपैयाँको सेयर कारोबार भएको छ।

कम्पनीको यसअघि सेयर मूल्य बढेर १७९९ रुपैयाँसम्म पुगेको थियो। पछि मूल्य समायोजन हुँदा ८०० रुपैयाँमा झरेको सेयर मूल्य अहिले पुनः बढ्न थालेको छ। यो बृद्धिले निरन्तरता पाउने आशामा लगानीकर्ता देखिएका छन्। जसका कारण सेयर मूल्य अझै माथि जाने अनुमान गरिएको छ।