काठमाडौं- चालु आर्थिक वर्षको ६ महिना (साउनदेखि पुससम्म) मा १४५ वटा साना, मध्यम र ठूला उद्योग दर्ता भएका छन्। उद्योग विभागका अनुसार यसरी दर्ता भएको उद्योगमा १ खर्ब ३९ अर्ब २७ करोड रुपैयाँभन्दा बढीको लगानी प्रतिबद्धता आएको छ।

जसमा सबैभन्दा बढी लगानी प्रतिबद्धता हाइड्रोपावर (इनर्जी क्षेत्र) मा रहेको छ। विभागका अनुसार इनर्जी क्षेत्रमा काम गर्ने गरी २७ वटा उद्योग दर्ता भएको छ। २७ वटा उद्योगमा ८९ अर्ब ७ करोड रुपैयाँभन्दा बढीको लगानी प्रतिबद्धता आएको छ।

यसैगरी पर्यटन उद्योगमा १८ अर्ब ९२ करोड रुपैयाँको लगानी प्रतिबद्धतासँगै ३१ वटा उद्योग दर्ता भएका छन्। साथै १५ अर्ब ९० करोड रुपैयाँको लगानी प्रतिबद्धतासँगै ५१ वटा उत्पादनमूलक काम गर्ने गरी उद्योग दर्ता भएका छन्।  

विभागका अनुसार सर्भिस क्षेत्रमा काम गर्ने गरी २६ वटा उद्योग दर्ता भएका छन्। २६ उद्योगमा १४ अर्ब २० करोड रुपैयाँको लगानी प्रतिबद्धता आएको छ।

यसैगरी कृषि क्षेत्रमा ४८ करोड रुपैयाँको लगानी प्रतिबद्धतासँगै ३ वटा उद्योग दर्ता भएको विभागले जनाएको छ।

साथै सूचना प्रविधि क्षेत्रमा ३७ करोड रुपैयाँको लागनी प्रतिबद्धतासँगै ५ वटा र खनिजजन्य उद्योगमा २९ करोड ९७ लाख रुपैयाँको लगानी प्रतिबद्धतासँगै २ वटा उद्योग दर्ता भएको विभागले जनाएको छ।