काठमाडौं-  प्रधानमन्त्री पुष्पकमल दाहाल प्रचण्डले संसदमा विश्वासको मत माग्दै अहिलेको सरकारमा जनताले ठूलो विश्वास गरेको बताएका छन्। सरकार गठन भएयता सेयर बजारमा देखिएको सुधार त्यसैको प्रमाण भएको उनले बताए।

संसदमा विश्वासको मत माग्दै उनले भने 'अहिले सेयर बजारमा आएको सकारात्मक परिवर्तनलाई सरकारप्रति जनताको विश्वासका रुपमा लिएको छु।' 

'वित्तीय, मौद्रिक, पुँजीबजार, सहकारी, बीमा र निजी कम्पनीका निकायहरूबीच आवश्यक समन्वय गरी निजी क्षेत्रको लगानी प्रवर्द्धन गर्न नीतिगत, संस्थागत तथा प्रक्रियागत सुधार यो सरकारका लक्ष्य हुनेछन्' उनले भनेका छन्।  

नयाँ सरकार गठन भएसँगै विश्वासको वातावरण देखिएको सेयर बजारमा लगातार वृद्धि देखिएको छ। नयाँ सरकार आएसँगै समग्रमा बजारमा ३४४.०८ अंकको वृद्धि भइसकेको छ। 

पुँजी बजारमा देखिएको गिरावटलाई सम्बोधन गर्नेगरी काम गर्ने सरकारी घोषणासँगै लगानीकर्ताहरू विश्वस्त देखिँदा सेयर बजारमा सुधार आइरहेको हो।