काठमाडौं- चालु आर्थिक वर्ष २०७९ को साउनदेखि मंसिर मसान्तसम्ममा १ सय १७ वटा उद्योग दर्ता भएका छन्। उद्योग विभागका अनुसार १ सय १७ उद्योगमा १ खर्ब १४ अर्ब  ६९ करोड १८ लाख २ हजार  ७१ रुपैयाँ लगानी प्रतिबद्धता आएको छ।

चालु आर्थिक वर्षको ५ महिनामा दर्ता भएका उद्योग र लगानी प्रतिबद्धता रकम गत आर्थिक वर्ष २०७८/०७९ को भन्दा कम हो। गत आर्थिक वर्षको पाँच महिनामा १३४ उद्योग दर्ता भएको थियो। दर्ता उद्योगमा कुल १ खर्ब ५१ अर्ब ८५ करोड १४ लाख १६ हजार ३ सय ९९ रुपैयाँ बराबरको लगानी प्रतिवद्धता आएको थियो।

गत आवको तुलनामा चालु आवमा ३७ अर्ब रुपैयाँ बराबरीका लगानी प्रतिबद्धता कम भएको हो।

विभागका अनुसार सबैभन्दा धेरै लगानी प्रतिबद्धता हाइड्रोपावरमा रहेको छ। पाँच महिनामा २४ वटा हाइड्रोपावरमा लगानी प्रतिबद्धता आएको छ। २४ वटा हाइड्रोपावर ८० लाख ३७ करोड रुपैयाँको लागनी प्रतिबद्धता आएको छ।

यसैगरी २६ होटल तथा क्यासिनो (पर्यटन क्षेत्र)मा कुल १३ अर्ब ८७ करोड रुपैयाँ लगानी प्रतिबद्धता आएको छ।

यसैगरी ४० वटा उत्पादनमूलक उद्योगमा १० अर्ब ९६ करोड रुपैयाँको लगानी प्रतिबद्धता आएको छ।