काठमाडौं- नेपाल विद्युत प्राधिकरणका पोलमा अनावश्यक रुपमा झुन्डिएका इन्टरनेट केबलका तार तथा डिभाइसको व्यवस्थापन समयमै नगरिए आफै हटाइदिने भनेर गरेको ताकेता अनुसार काम नभएपछि काठमाडौंभित्रका केही ठाउँमा हटाउने भएको छ।
यसअघि ४५ दिनभित्र हटाउन निर्देशन दिएको भएपनि रत्नपार्क-केशरमहल-लाजिम्पाट-नारायणगोपाल चोक खण्डमा प्रगति नभएको भन्दै प्राधिकरणले इन्टरनेट पुस ११ गते हटाउने भएको हो।
कात्तिक १५ मै निर्देशन दिएको थियो। तर अहिलेसम्म पनि अवस्थिति तारको व्यवस्थापन नभएको भन्दै प्राधिकरणले ऐन अनुसार व्यवस्थापन गर्न लागिएको जानकारी गराएको छ।
तोकिएको समयमा सुधार कार्य नगर्ने/नगराउने सेवा प्रदायकहरूको केबल लगायतका उपकरणहरू प्राधिकरण आफैँले हटाउने हुँदा यसबाट हुन सक्ने नोक्सानीका लागि इन्टरनेट/केबल टी. भी. / दूरसञ्चार सेवा प्रदायक स्वयं जिम्मेवारी हुने चेतावनीयुक्त सार्वजनिक सूचना प्राधिकरणले जारी गरेको छ।
इन्टरनेट सेवाप्रदायकहरूले पछिल्लो समय काठमाडौं उपत्यकामा तारको व्यवस्थान गरिरहेका छन्। यद्यपि सबैले नगरेको पाइएको प्राधिकरणले जानकारी गराएको छ।
उपयोग नभएका तार पनि पोलमा झुन्डिँदा सहर कुरुप देखिएको तथा आधारभूत सेवाप्रवाहमा समेत असर देखिएको प्राधिकरणले उल्लेख गर्दै आएको छ।
